2 րոպեի ընթերցում
ԱՐՄԱՎԻՐ, 10 ՆՈՅԵՄԲԵՐԻ, ԱՐՄԵՆՊՐԵՍ։ Երևան-Գյումրի ավտոճանապարհի՝ Աշտարակ-Թալին հատվածի շինարարությունը նախատեսվում է ավարտին հասցնել 2023 թվականին։ «Արմենպրես»-ի հաղորդմամբ՝ մամուլի ասուլիսի ժամանակ այս մասին ասաց ՀՀ տարածքային կառավարման և ենթակառուցվածքների նախարար Գնել Սանոսյանը։
Նախարարի խոսքով՝ մի փոքր խնդիր կա Աշտարակ-Թալին ճանապարհահատվածի հետ կապված, քանի որ շինարարություն իրականացնող նախորդ ընկերության նկատմամբ դատական գործընթաց կա:
«Այդ հատվածում երկու գործընթաց ենք նախաձեռնել՝ հնարավորինս մեղմել վթարավտանգ վայրերը, կահավորել լրացուցիչ նշաններով կահավորելու կամ կատարել այլ շինարարական աշխատանքներ անելու։ Բայց դրան զուգահեռ գլխավոր գործընթացը այն է, որ պետք է կազմակերպվի մրցութային փուլ, ընտրվի նոր շինարարական ընկերություն և բուն շինարարական գործընթացը նախաձեռնել։ Դրա համար դժվար է ժամկետները ասել, բայց կավարտենք այդ հատվածը 2023 թվականին»,- նշեց Սանոսյանը։
Անդրադառնալով Թալին-Լանջիկ ու Լանջիկ-Գյումրի հատվածների մասին՝ նախարարը հայտնեց, որ մեկ ուղղությամբ ճանապարհն արդեն պատրաստ է, և 2022 թվականին երկու հատվածն էլ ավարտին կհասցվի։
«Մի ճանապարհը պատրաստ կլինի հաջորդ տարվա սեպտեմբերին, իսկ մյուսը՝ տարեվերջին»,- եզրափակեց Սանոսյանը։
