Հայաստանը մտադիր է վերսկսել Երևանում անվտանգության հարցերով համաժողովներ անցկացնելու պրակտիկան․ Փաշինյան
1 րոպեի ընթերցում
ԴՈՒՇԱՆԲԵ, 16 ՍԵՊՏԵՄԲԵՐԻ, ԱՐՄԵՆՊՐԵՍ։ ՀԱՊԿ նախագահության ընթացքում Հայաստանը մտադիր է վերսկսել Երևանում անվտանգության հարցերով համաժողովներ անցկացնելու պրակտիկան, այդ թվում` հաշվի առնելով ՀԱՊԿ, ԵԱՀԿ և ՄԱԿ աշխատանքային մարմինների հետ արդեն ձևավորված երկխոսությունը:
Ինչպես տեղեկացնում է «Արմենպրես»-ը, ՀԱՊԿ Հավաքական անվտանգության խորհրդի ընդլայնված նիստին այս մասին ասաց ՀՀ վարչապետ Նիկոլ Փաշինյանը։
«Մենք արդեն լսել ենք մեր ղազախ ընկերներից համահունչ դիրքորոշում և պատրաստ ենք սերտ համատեղ աշխատանքի»,- հավելեց Փաշինյանը։
ՀՀ վարչապետը նաև առաջարկեց շարունակել իրավանորմատիվային և կազմակերպչական փաստաթղթերի մշակումը, ինչը թույլ կտա ունենալ այսօրվա իրողություններին համապատասխան նորացված իրավապայմանագրային բազա:
ՀՀ վարչապետն ակնկալում է նաև ստանալ ՀԱՊԿ անդամ երկրների ղեկավարների աջակցությունը երիտասարդ սերնդի հետ աշխատանքում` Հայաստանում ՀԱՊԿ անդամ երկրների ուսանողների համար անվտանգության հարցերով ամառային դպրոցներ ստեղծելու միջոցով: