1 րոպեի ընթերցում
ԵՐԵՎԱՆ, 18 ՕԳՈՍՏՈՍԻ, ԱՐՄԵՆՊՐԵՍ: Արաբական Միացյալ Էմիրությունների արտգործնախարարությունը հաստատել է այն տեղեկությունները, որ Աֆղանստանի նախկին նախագահ Աշրաֆ Ղանին իր ընտանիքով գտնվում է այդ երկրում: «Արմենպրես»-ի հաղորդմամբ՝ այս մասին հայտնում է «ՌԻԱ Նովոստի» գործակալությունը՝ վկայակոչելով ԱՄԷ ԱԳՆ-ի հաղորդագրությունը:
Ըստ աղբյուրի՝ Էմիրությունները ընդունել են նախագահ Աշրաֆ Ղանիին և իր ընտանիքին «մարդասիրական նկատառումներով»:
Իրավիճակը Աֆղանստանում կտրուկ սրվել էր հատկապես օգոստոսի առաջին տասնօրյակում: Օգոստոսի 15-ին ԶԼՄ-ները հաղորդեցին, որ «Թալիբան» ծայրահեղական խմբավորման զինյալները մտել են մայրաքաղաք Քաբուլ՝ գրավելով նախագահական պալատը, իսկ նախագահ Աշրաֆ Ղանին հրաժարական է տվել՝ լքելով երկիրը: Օգոստոսի 15-16-ի գիշերը թալիբների քաղաքական գրասենյակի ներկայացուցիչ Մուհամմադ Նաիմը հայտարարեց, որ պատերազմը Աֆղանստանում ավարտված է, իսկ պետության կառավարման ձևը կհստակեցվի մոտ ժամանակներում: