ԿԽՄԿ աջակցությամբ «Ջրմուղ-կոյուղի»-ն բաքեր է տեղադրում Ստեփանակերտի ջրազուրկ բնակելի շենքերի բակերում
1 րոպեի ընթերցում
ՍՏԵՓԱՆԱԿԵՐՏ, 15 ՕԳՈՍՏՈՍԻ, ԱՐՄԵՆՊՐԵՍ: Ստեփանակերտի ջրազուրկ թաղամասերի բնակիչներին խմելու ջրով ապահովելու գործին իր նպաստն է բերում նաև Լեռնային Ղարաբաղում Կարմիր խաչի միջազգային կոմիտեի առաքելությունը: Մասնավորապես, վերջինիս աջակցությամբ «Ջրմուղ-կոյուղի» ՓԲ ընկերության կողմից բաքեր են տեղադրվում ջրազուրկ բնակելի շենքերի բակերում: «Արմենպրես»-ի հաղորդմամբ՝ «Ֆեյսբուք»-ի իր էջի գրառմամբ այս մասին տեղեկացրել է Ստեփանակերտի քաղաքապետարանը։
Ըստ աղբյուրի՝ քաղաքապետարանի ներկայացուցիչները շրջայցեր են կատարել և համոզվել, որ քաղաքի ավտոլվացման կետերը չեն աշխատում: «Շնորհակալություն ենք հայտնում բոլոր նրանց, ովքեր ըմբռնումով են մոտենում ջրօգտագործման որոշ սահմանափակումներին և դրանով իսկ օգնում ժամ առաջ հաղթահարել մեր բնակչությանը պատուհասած դժվարությունները»,- ասվում է գրառման մեջ:
