2 րոպեի ընթերցում
ԵՐԵՎԱՆ, 7 ՀՈՒԼԻՍԻ, ԱՐՄԵՆՊՐԵՍ: Ֆուտբոլի Եվրոպայի առաջնության կիսաեզրափակիչի երկրորդ խաղում միմյանց հետ կմրցեն Անգլիան և Դանիան:
«Արմենպրես»-ի հաղորդմամբ` Լոնդոնի «Ուեմբլի» մարզադաշտում կայանալիք հանդիպումը խոստանում է դիտարժան լինել: Անգլիան խաղում է սեփական հարկի տակ, և այս հանգամանքն ինչ-որ տեղ կարող է հավելյալ ուժ լինել Գարեթ Սաութգեյթի ֆուտբոլիստների համար, ովքեր քառորդ եզրափակիչում խոշոր հաշվով առավելության հասան Ուկրաինայի նկատմամբ (4:0): «Երեք առյուծները» մեծ ներուժով են մոտենում կիսաեզրափակիչի այս խաղին:
Դանիան Անգլիային հաղթել է անցած տարի` Ազգերի լիգայի մրցաշարի շրջանակում: Եվ հենց «Ուեմբլիում» կայացած այդ խաղի հաղթական գնդակը խփել է Քրիստիան Էրիկսենը, ով Եվրոյի մեկնարկում սրտի կանգի պատճառով չկարողացավ օգնել թիմին և այժմ բժիշկների հսկողության ներքո է: Կասպեր Յուլմանի գլխավորած թիմի հարձակման գիծն առանձնանում է իր արդյունավետությամբ: Դանիան Եվրոպայի այս առաջնության «թաքնված ուժերից է»:
Անգլիայի ֆուտբոլի ազգային թիմի գլխավոր մարզիչ Գարեթ Սաութգեյթի կարծիքով, իրենք «գիտեն Դանիայի ազգային թիմի ներուժի մասին»: Ըստ անգլիացիների մարզչի՝ այս հանդիպումն անմոռանալի է լինելու:
Դանիայի հավաքականի գլխավոր մարզիչ Կասպեր Յուլմանն անհամբեր է կիսաեզրափակիչ խաղից առաջ: «Մեզ համար մոտիվացիա կլինի այն, որ ստիպենք մարզադաշտում ներկա երկրպագուներին լռել: Հեշտ չի լինելու»,- ասել է նա:
Ֆուտբոլի Եվրոպայի առաջնության կիսաեզրափակիչի Անգլիա-Դանիա հանդիպումը կմեկնարկի Երևանի ժամանակով 23:00-ին: