Ազգային-ժողովրդավարական բևեռ կուսակցությունը նախընտրական շրջանում առաջարկում է անցումային կառավարման ծրագիր
1 րոպեի ընթերցում
ԵՐԵՎԱՆ, 8 ՀՈՒՆԻՍԻ, ԱՐՄԵՆՊՐԵՍ: «Ազգային-ժողովրդավարական բևեռ» կուսակցությունն արտահերթ խորհրդարանական ընտրությունները համարում է լծակ՝ անցումային կառավարման ծրագիր իրագործել կարողանալու համար:
«Արմենպրես»-ի հաղորդմամբ՝ կուսակցության ընտրական ցուցակի ներկայացուցիչ Վահե Գասպարյանն այս մասին ասաց լրագրողների հետ զրույցում:
«Այդ ծրագիրը նախատեսում է իրավաքաղաքական գնահատական նախկին իշխանություններին, դրանից բխող անցումային արդարադատություն՝ լյուստրացիա, նոր սահմանադրության ընդունում ու նոր ընտրական օրենսգիրք: Մեր հիմնական պայքարը լինելու է հրապարակային, ժողովրդին մոբիլիզացնելու ձևով, ինչպես նաև ժողովրդի կամքը պարտադրելու միջոցով, քանի որ իշխանությունը հենց ժողովուրդն է: Այս ընտրությունները համարում ենք լծակ, միջոց ու գործիք մեր նպատակին հասնելու համար»,- ասաց Գասպարյանը և հավելեց, որ խորհրդարան մուտք գործելով՝ իրենք կկարողանան ավելի տեսանելի ու արդյունավետ աշխատել ժողովրդի հետ:
Կուսակցության մյուս անդամ Արա Պապյանն ընդգծեց՝ ԱԺԲ-ն գալիս է արմատապես նոր գաղափարներով, որոնք ավելի դրական ու արդյունավետ արդյունքներ կտան: