Թուրքագետը վստահ է՝ Թուրքիայի համար անկյունաքարային հարց է Մեղրիով դեպի Նախիջևան ճանապարհ ունենալը
1 րոպեի ընթերցում
![Թուրքագետը վստահ է՝ Թուրքիայի համար անկյունաքարային հարց է Մեղրիով դեպի Նախիջևան ճանապարհ ունենալը](http://armenpress.am/resized/480/static/news/b/2020/12/1037111.jpg)
ԵՐԵՎԱՆ, 8 ԴԵԿՏԵՄԲԵՐԻ, ԱՐՄԵՆՊՐԵՍ: Թուրքագետ, ԵՊՀ արևելագիտության ֆակուլտետի դեկան Ռուբեն Մելքոնյանի համոզմամբ՝ Թուրքիայի համար այսօր անկյունաքարային է Մեղրիով դեպի Նախիջևան ճանապարհ ունենալու հարցը:
«Արմենպրես»-ի հաղորդմամբ՝ «Ներկա իրավիճակում մտավորականի դերը» նախաձեռնության շրջանակում կազմակերպված հանդիպմանը Մելքոնյանը շեշտեց, որ արևելագետ ուսանողներն անգամ կարող են փաստել, որ դա պանթուրանական ծրագրի ամենակարևոր, ամենացանկալի կետն է:
«Նրանք ձգտում են ամենացանկալի ճանապարհով Թուրքիան կապել Նախիջևանին, Նախիջևանը ցամաքային ճանապարհով կապել Ադրբեջանին և այդպես շարունակ: Թուրքիայի և՛ նախագահի, և՛ ԱԳՆ նախարարի հայտարարությունները հիմնականում սևեռված են հենց Մեղրիի խնդրի վրա, թե ինչպիսի ճանապարհ պետք է լինի, ինչպես գործարկվի»,-ասաց թուրքագետն ու հավելեց, որ չի բացառում՝Թուրքիան հայտարարի, որ կարող է բացել Հայաստանի հետ սահմանը, ինչը մեզ համար սպառնալիք է լինելու, որովհետև մենք պատրաստ չենք դրան: