ԼՂ հակամարտությունը ռազմական լուծում չունի. Մոսկվայի դիրքորոշումը վերահաստատել է Պանկինը
1 րոպեի ընթերցում
ՄՈՍԿՎԱ, 7 ՀՈԿՏԵՄԲԵՐԻ, ԱՐՄԵՆՊՐԵՍ: Ռուսաստանի Դաշնությունը համոզված է, որ այժմ թեժ փուլում գտնվող Լեռնային Ղարաբաղի հակամարտությունը ռազմական լուծում չունի: Այս մասին հայտնել է ՌԴ արտաքին գործերի նախարարի տեղակալ Ալեքսանդր Պանկինը ՀԱՊԿ ռազմավարական զարգացման ուղենիշների վերաբերյալ կլոր սեղանի ընթացքում:
«Մենք համոզված ենք, որ Լեռնային Ղարաբաղի հակամարտությունը, որը այժմ բավական թեժ փուլում է, չունի ռազմական լուծում: Խաղաղ բնակչության շրջանում զոհերի թվի ավելացումը մեզ խորը վիշտ է պատճառում»,-«Արմենպրես»-ի հաղորդմամբ՝ ասել է Պանկինը:
Դիվանագետը շեշտել է, որ Մոսկվան կողմերին շուտափույթ հրադադարի կոչ է անում. «Ռուսաստանը ամեն կերպ օժանդակելու է Լեռնային Ղարաբաղի հակամարտության կարգավորման վերադարձին դեպի խաղաղ հուն՝ քաղաքական, դիվանագիտական մեթոդներով, ԵԱՀԿ Մինսկի խմբի համանախագահության շրջանակներում՝ Ռուսաստանի, ԱՄՆ-ի և Ֆրանսիայի նախագահների վերջին համատեղ հայտարարության հիման վրա»: