Ցանկությունն ու նվիրվածությունը հավաքականին ավելի կարևոր է, քան բուն ֆուտբոլային որակները. Կապառոս
2 րոպեի ընթերցում
ԵՐԵՎԱՆ, 17 ՀՈՒԼԻՍԻ, ԱՐՄԵՆՊՐԵՍ: Հայաստանի ֆուտբոլի ազգային թիմի գլխավոր մարզիչ Խոակին Կապառոսին դուր է եկել ֆուտբոլիստների նվիրվածությունն ազգային հավաքականին:
«Արմենպրես»-ի հաղորդմամբ` առցանց պատասխանելով լրագրողների հարցերին և խոսելով Հայաստանի ազգային թիմ հրավիրված Սոլոմոն Ուդոյի մասին, Կապառոսը շեշետեց, որ հետևել է այդ ֆուտբոլիստի խաղին և հարցով դիմել է ֆեդերացիային` Ուդոյին ընտրանի հրավիրելու համար: Մասնագետի կարծիքով, ցանկությունն ու նվիրվածությունը հավաքականին ավելի կարևոր է, քան բուն ֆուտբոլային որակները: Ըստ նրա` հավաքականին նոր մրցակցություն կհաղորդի ընտրանի հրավիրված ևս մեկ ֆուտբոլիստ: Մարզչական շտաբը չի պատրաստվում ոչ մի հայ ֆուտբոլիստի անտեսել և պատրաստ է հնարավորություն տալ, եթե գտնի, որ վերջինս արժանի է խաղալ ընտրանու կազմում:
«Մինչ այս զրույց եմ ունեցել ազգային թիմի 19-20 ֆուտբոլիստի հետ: Ինձ հաճելիորեն զարմացրեց բոլոր տղաների նվիրվածությունը, և որ նրանք ցանկություն հայտնեցին հետագայում ևս հանդես գալ հավաքականում»,- ասաց նա:
Կապառոսը հրաժարվեց կարծիք հայտնել Լուկաս Սելարայանի, Խորեն Բայրամյանի, Արշակ Կորյանի և այլոց մասին, քանի որ դեռևս ոչինչ վերջնականապես հայտնի չէ:
«Հնարավոր է, որ երիտասարդ թիմի անդամները խաղան հավաքականում, սակայն շատ կարևոր է, որ նրանք խաղային փորձ ունենան: Երիտասարդներին անհրաժեշտ է խաղալ, անհրաժեշտ է սխալներ թույլ տալ, իսկ եթե նրանք խաղային փորձ չունեն, պարզապես անհետանում են: Հայաստանի այլ տարիքային հավաքականների մարզիչները լավ աշխատանք են կատարում»,- ասաց իսպանացի մարզիչը:
Անդրադառնալով հավաքականի առաջիկա ընկերական խաղերում մրցակիցների ընտրությանը (Ալբանիա, Քուվեյթ հեղ.), Կապառոսն ասաց, որ այդ ընկերական խաղերում դաշտում կլինեն այն ֆուտբոլիստներ, որոնք մինչ այս հաճախ հնարավորություն չեն ստացել ցուցադրելու իրենց ունակությունները:
Պատրաստեց Վարվառա Հայրապետյանը