2 րոպեի ընթերցում
ԵՐԵՎԱՆ, 13 ԱՊՐԻԼԻ, ԱՐՄԵՆՊՐԵՍ։ Տարիքային առումով Հայաստանում կորոնավիրուսային հիվանդության ռիսկային խմբում է ավելի քան 353 հազար մարդ։ «Արմենպրես»-ի փոխանցմամբ` այս մասին ապրիլի 13-ին ընթացող Ազգային ժողովի հատուկ նիստի ընթացքում ասաց ՀՀ փոխվարչապետ, Արտակարգ դրության ռեժիմի պարետ Տիգրան Ավինյանը։
«Վարակի տեսանկյունից` ռիսկայնության իմաստով, Հայաստանի մշտական բնակչության 12%-ը կամ ավելի քան 353 հազար մարդ համարվում է ռիսկային խումբ, անկախ առողջական վիճակից»,- ասաց Ավինյանը։
Փոխվարչապետը ներկայացրեց նաև խրոնիկ հիվանդություններ ունեցող քաղաքացիների քանակը, որոնք ևս գտնվում են հիվանդության ռիսկային խմբում։
«Երկրորդ տիպի շաքարային դիաբետ ունեցող անձանց թիվը 77418 է, սրտի իշեմիկ հիվանդություն` 71025 քաղաքացի, հիպերտենզիա` 145 408 քաղաքացի։ Հիվանդությունների թվերը միայն հայտնի, գրանցված դեպքերն են»,-նշեց փոխվարչապետը։
Տիգրան Ավինյանը հավելեց, որ ամենառիսկային խմբում են նրանք, որոնք ունեն մի քանի խրոնիկ հիվանդություն և բարձր տարիք։
Հայաստանի կառավարությունն ապրիլի 14-ին կայացած արտահերթ նիստում ընդունեց hանրապետությունում 2020 թվականի մարտի 16-ին հայտարարված արտակարգ դրության ժամկետը 2020 թվականի ապրիլի 14-ից ժամը 17:00-ից` 30 օրով՝ մինչև 2020 թվականի մայիսի 14-ը ժամը 17:00-ն երկարաձգելու որոշում։ Երկրում գործում է խիստ սահմանափակումների ռեժիմ:
Ապրիլի 13-ի, ժամը 11:00-ի դրությամբ` Հայաստանում կորոնավիրուսի հաստատված դեպքերի թիվը 1039 է։ Վիրուսից ապաքինվել է 211 անձ, մահացել` 14-ը։ Փաստացի բուժում է ստանում 814 պացիենտ։
Նորայր Շողիկյան