Ուհանում հիվանդանոց է փակվել, կորոնավիրուսով վարակվածության նոր դեպքերի թիվը նվազում է

ԵՐԵՎԱՆ, 2 ՄԱՐՏԻ, ԱՐՄԵՆՊՐԵՍ: Կորոնավիրուսի էպիկենտրոն համարվող Չինաստանի Ուհան քաղաքում փակվել է հատուկ կառուցված 16 հիվանդանոցներից մեկը՝ վերջին պացիենտին դուրս գրելուց հետո: «Արմենպրես»-ի հաղորդմամբ, «Reuters»-ը տեղեկացնում է, որ պատճառն այն է, որ վարակվածության նոր դեպքերի թվի անկում է նկատվում:

Հիվանդանոցը փակելու մասին տեղեկությունը համընկավ Հուբեյ նահանգում, մասնավորապես, կենտրոն համարվող Ուհանում նոր հիվանդացությունների թվի կրճատման հետ: Չնայած դրան, Չինաստանը շարունակում է հատուկ ուշադրության կենտրոնում պահել իրենց տները վերադարձողներին, հատկապես այն երկրներից, որտեղ նոր բռնկումներ են:

Չինաստանի առողջապահության ազգային հանձնաժողովի ներկայացուցիչը տեղեկացրել էր, որ Ուհանում իրավիճակը, կարծես, վերահսկելի է դառնում, դրական միտում է նկատվում:

Կորոնավիրուսն ի հայտ է եկել Ուհան քաղաքում նախորդ տարվա վերջին և այդ ժամանակից ի վեր վարակել է ավելի քան 86 հազար 500 մարդ:

Չինաստանում, որտեղից նոր կորոնավիրուսն սկսել է տարածվել մյուս երկրներ, վիրուսից զոհերի թիվը հասել է 2912-ի՝ մեկ օրում ավելանալով 42-ով: Այդ մասին մարտի 2-ին հայտնել է ՉԺՀ-ի հիգիենայի եւ առողջապահության հարցերի պետական կոմիտեն: Երկրների թիվը, որտեղ կորոնավիրուս է հայտնաբերվել, հասել է 65-ի: