2 րոպեի ընթերցում
ԵՐԵՎԱՆ, 1 ՄԱՐՏԻ, ԱՐՄԵՆՊՐԵՍ: Կորոնավիրուսի հետ կապված մեկ շաբաթ դասերը Հայաստանի ուսումնական հաստատություններում դադարեցնելու որոշում է կայացվել։ Այս մասին «Ֆեյսբուք»-ի իր էջի ուղիղ եթերում նշեց ՀՀ վարչապետ Նիկոլ Փաշինյանը։ «Մեզ պետք է որոշակի ժամանակ վերցնել, ավելի մանրամասն հասկանալ, ինչ է կատարվում»,- ընդգծեց ՀՀ վարչապետը։
«Արմենպրես»-ի հաղորդմամբ՝ Փաշինյանը տեղեկացրեց, որ այդպիսով գարնանանյին արձակուրդները մեկ շաբաթ առաջ տեղի կունենան։
Նա վստահեցրեց, որ կորոնավիրուսիկանխարգելմանհանձնաժողովն աշխատում է անընդհատ, և հորդորեց վստահել միայն պաշտոնական տեղեկատվությանը։ «Այս իրավիճակը մենք պատվով, ուժեղացած կհաղթահարենք»,- շեշտեց Նիկոլ Փաշինյանը։ Նա նաև ընդգծեց, որ կառավարությունը որևէ կենսականորեն անհրաժեշտ տեղեկատվություն չի թաքցնելու և շեշտեց. «Բացառված է, որ կառավարությունը որևէ այլ նպատակ ավելի կարևոր համարի, քան հանրային առողջության և անվտանգության խնդիրները»։
ՀՀ վարչապետը հավելեց, որ մտնելու է դեղատուն՝ բժշկական դիմակների հետ կապված իրավիճակին ծանոթանալու համար։
Անդրադառնալով Իրանի հետ հաղորդակցության խնդիրներին՝ վարչապետը նկատեց, որ Իրանի հետ սահմանը փակելու անհրաժեշտություն չկա, մանավանդ որ դա կարող է հանգեցնել «շուկայի վայրիվերումների», իսկ օդային հաղորդակցության դադարեցման դեպքում ավտոմեքենաներով Իրանից Հայաստան եկողները պետք է ավելի շատ մարդկանց հետ շփվեին քաղաքներում, քան օդանավով գալու դեպքում։
Նիկոլ Փաշինյանը պարզաբանեց, որ հերքվել է այն տեղեկատվությունը, թե այն անձը, որի մոտ լույս մարտի 1-ի գիշերը կորոնավիրուսի է հայտնաբերվել, «Զվարթնոց» օդանավակայանից տուն է գնացել տաքսիով։ Վարչապետը հորդորեց ռիսկային գոտի չհամարել Ծաղկաձորը, որի «Գոլդեն Փելես» մինչ այժմ չգործող հյուրանոցում տեղավորված են այդ անձի հետ շփում ունեցած անձինք, և նկատեց, որ Ծաղկաձորում կյանքը պետք է բնականոն կերպով շարունակվի։