Հայաստանից արտագաղթը դադարում է. Նիկոլ Փաշինյան

ԲԵՌԼԻՆ, 14 ՓԵՏՐՎԱՐԻ, ԱՐՄԵՆՊՐԵՍ։ 2018 թվականից ի վեր ԵՄ տարածքում կարգավիճակ փնտրող ՀՀ քաղաքացիների թիվը կրճատվել է կրկնակիից շատ։ Ինչպես հաղորդում է «Արմենպրես»-ի թղթակիցը Բեռլինից, այդ մասին Ֆրիդրիխ Էբերթ հիմնադրամում հանդիպմանը նշեց ՀՀ վարչապետ Նիկոլ Փաշինյանը՝ պատասխանելով այն հարցին, թե երկրում կատարված փոփոխություններն ինչ ձևով են ազդում արտագաղթի տեմպերի վրա։

«ԵՄ-ում Հայաստանից կարգավիճակ փնտրող անձանց թիվը մոտ 60 տոկոսով կրճատվել է։ Եվ մենք 2018 թվականից ի վեր Հայաստանում քաղաքացիների մուտքի և ելքի ցուցանիշներում էական առումով դրական դինամիկա ունենք։ Մասնավորապես, 2019 թվականին մեր երկիր մուտք գործած քաղաքացիների թիվը 10 հազարով ավելին է»,-ասաց Նիկոլ Փաշինյանը։

Նա նշեց, որ Հայաստանի անշարժ գույքի շուկայում գներն աճել են, հիփոթեկային վարկերի ծավալը 2017 թվականի համեմատ աճի կրկնապատկման տեմպեր է ցույց տալիս։ Նա հույս հայտնեց, որ այս պրոցեսը կշարունակվի։

«Շատ կուզենայի ասել, որ արտագաղթը ՀՀ-ից դադարել է, բայց ասեմ, որ արտագաղթը Հայաստանից դադարում է։ Թվերը դա են ցույց տալիս»,- հավելեց Նիկոլ Փաշինյանը։