«Իմ քայլը» և Մնացականյանը քննարկել են խորհրդարանական դիվանագիտության արդյունավետության բարձրացումը
1 րոպեի ընթերցում
ԵՐԵՎԱՆ, 16 ՀՈՒՆՎԱՐԻ, ԱՐՄԵՆՊՐԵՍ: ՀՀ Ազգային ժողովի «Իմ քայլը» խմբակցությունը ՀՀ արտաքին գործերի նախարար Զոհրաբ Մնացականյանի հետ քննարկել է խորհրդարանական դիվանագիտության արդյունավետության բարձրացման հարցը:
«Արմենպրես»-ի փոխանցմամբ` այս մասին հունվարի 16-ին լրագրողների հետ զրույցում ասաց խմբակցության ղեկավար Լիլիթ Մակունցը:
«Հանդիպումը գնահատում եմ բավականին արդյունավետ, և դրական եմ համարում պարբերաբար մեր աշխատանքային քննարկումները կառավարության ներկայացուցիչների հետ: Այն բոլոր հարցերը, որոնք կուտակվում են, հնարավորություն է լինում քննարկել և հասկանալ, թե ինչ է տեղի ունենում: Մենք փորձում էինք հասկանալ, թե ինչպես ավելի արդյունավետ կարող ենք օգտագործել խորհրդարանական դիվանագիտության հարթակները, և մեր գործողությունները համադրելի դարձնել այդ առումով, որպեսզի ունենանք առավելագույն արդյունք»,- ասաց Մակունցը:
Հունվարի 16-ին ԱԺ «Իմ քայլը» խմբակցությունը հանդիպում անցկացրեց ՀՀ արտաքին գործերի նախարար Զոհրաբ Մնացականյանի հետ: