Մակրոտնտեսական հիմնական ցուցանիշներով 2018-ի հունվարին երկնիշ ու եռանիշ աճի տեմպեր են արձանագրվել 2016-ի հունվարի համեմատ
ԵՐԵՎԱՆ, 22 ՓԵՏՐՎԱՐԻ, ԱՐՄԵՆՊՐԵՍ: Մակրոտնտեսական հիմնական ցուցանիշների գծով 2018-ի հունվարին 2016 թվականի նույն ժամանակահատվածի համեմատ երկնիշ, երբեմն նաև եռանիշ աճ է արձանագրվել: «Արմենպրես»-ի փոխանցմամբ` ՀՀ վարչապետ Կարեն Կարապետյանը ֆեյսբուքյան իր էջում տեղադրել է նշյալ ժամանակահատվածների համեմատականը ներկայացնող ինֆոգրաֆիկա, ըստ որի` տնտեսական ակտիվության աճի տեմպը 2018-ի հունվարին 2016-ի հունվարի համեմատ 17.6 տոկոսով ավելի է եղել:
Ընթացիկ տարվա հունվարին ներքին առևտրաշրջանառության աճի տեմպի դինամիկան կազմել է 27.9 տոկոս, ընդ որում` մանրածախ առևտրինը` 7.8 տոկոս: Ընթացիկ տարվա հունվարին շինարարության ծավալի աճի տեմպը 2016-ի նույն ժամանակահատվածի համեմատ բարձր է եղել 13.3 տոկոսով, արդյունաբերական արտադրանքի ծավալի աճի տեմպի դինամիկան կազմել է 26 տոկոս:
Առևտրաշրջանառության և ներմուծման ծավալների աճի տեմպերի դինամիկան եռանիշ ցուցանիշ է գրանցել` համապատասխանաբար` 111 և 120 տոկոս, այսինքն` աճել է ավելի քան երկու անգամ: Արտահանման աճի տեմպի դինամիկան կազմել է 97 տոկոս:
Միայն գյուղատնտեսության ծավալի աճի տեմպի դինամիկան նվազել է 0.2 տոկոսով:
Բաժանորդագրվեք մեր ալիքին Telegram-ում