«Մեթյու» փոթորիկն ավերածություններ Է գործում Հայիթիում
2 րոպեի ընթերցում
![«Մեթյու» փոթորիկն ավերածություններ Է գործում Հայիթիում](http://armenpress.am/resized/480/static/news/b/2016/10/862459.jpg)
ԵՐԵՎԱՆ, 4 ՀՈԿՏԵՄԲԵՐԻ, ԱՐՄԵՆՊՐԵՍ: «Մեթյու» փոթորիկը, որը վերջին տասնամյակների ընթացքում ամենաուժգին փոթորիկներից մեկն Է համարվում Ատլանտյան օվկիանոսում, պատուհասել Է Հայիթիի ափերը: Հորդառատ անձրեւներից եւ սաստիկ քամուց արդեն տուժել են կղզու հարավարեւմտյան շրջանում գտնվող քաղաքներն ու գյուղերը: Զոհվել Է առնվազն երկու մարդ (երկուսն Էլ ձկնորսներ), տեղեկացնում Է «Արմենպրես»-ը՝ հղում անելով BBC-ին:
Փոթորկին տրվել Է բարդության չորրորդ աստիճանը: Փորձագետները նախազգուշացնում են, որ սաստիկ անձրեւները կարող են հեղեղումներ առաջացնել Հայիթիում, Ջամայկայում եւ Դոմինիկյան Հանրապետությունում:
Օդերեւութաբանները նշում են, որ «Մեթյու» փոթորկի արագությունը հասնում Է ժամում 230 կիլոմետրի: Այն բանից հետո, երբ փոթորիկը կանցնի Հայիթիի հարավարեւմտյան մասով, այն կշարժվի դեպի Կուբա, այնուհետեւ Բահամյան կղզիներ:
Հոկտեմբերի 6-ին փոթորիկը կհասնի ԱՄՆ-ի Ֆլորիդայի նահանգի ափերին:
Մոտեցող փոթորկի պատճառով Կուբայի արեւելյան շրջանում տարհանվել Է շուրջ 316 հազար մարդ: «20 հազար մարդ տեղավորվել Է ապաստարաններում, եւս 296 հազար մարդ տեղավորվել Է մասնավոր տներում ու բնակարաններում»,-նշվում Է ԶԼՄ-ների հաղորդագրություններում:
Ինչպես գրում Է «Ինտերֆաքս»-ը, ցիկլոնի մասին Կուբայի իշխանությունները նախազգուշացում են հայտարարել երկրի վեց արեւելյան նահանգներում, ներառյալ Սանտյագո դե Կուբան եւ Գուանտանամոն: