Չինաստանն ԱՄՆ-ին կոչ է արել ձեռնպահ մնալ դեպի Թայվան կոնգրեսականների այցելություններ կազմակերպելուց
2 րոպեի ընթերցում
![Չինաստանն ԱՄՆ-ին կոչ է արել ձեռնպահ մնալ դեպի Թայվան կոնգրեսականների այցելություններ կազմակերպելուց](http://armenpress.am/resized/480/static/news/b/2024/05/1137814.jpg)
ԵՐԵՎԱՆ, 23 ՄԱՅԻՍԻ, ԱՐՄԵՆՊՐԵՍ: Չինաստանի արտգործնախարարության խոսնակ Վան Վենբինը հայտարարել է, որ Միացյալ Նահանգները պետք է ձեռնպահ մնա Կոնգրեսի անդամների՝ Թայվան այցեր կազմակերպելուց, սակայն եթե Վաշինգտոնը շարունակի այդ ճանապարհը, ապա նա կկրի հետևանքների ողջ պատասխանատվությունը։
«Արմենպրես»-ի հաղորդմամբ՝ այս մասին հայտնում է ՌԻԱ Նովոստին-ն՝ մեջբերելով Չինաստանի ԱԳՆ խոսնակն հայտարարությունը լրատվականների հետ ճեպազրույցից։
«Չինաստանը միշտ վճռականորեն դեմ է եղել ԱՄՆ-ի և Թայվանի միջև պաշտոնական շփումների ցանկացած ձևին, ինչպես նաև Թայվանի գործերին Վաշինգտոնի միջամտությանը ցանկացած ձևով կամ պատրվակով»,- ասել է Վենբինը։
Նա նաև հավելել է, որ ԱՄՆ Կոնգրեսը երկրի կառավարության անբաժանելի մասն է և պետք է խստորեն պահպանի ԱՄՆ-ի վարած «մեկ Չինաստանի» քաղաքականությունը։
«Եթե ԱՄՆ կոնգրեսականներն այցելեն Թայվան, դա կլինի «մեկ Չինաստան» սկզբունքի և չին-ամերիկյան երեք համատեղ կոմյունիկեի դրույթների կոպիտ խախտում, միջամտություն Չինաստանի ներքին գործերին, դա կվնասի նաև ժողովրդի ինքնիշխանությանը և տարածքային ամբողջականությանը։ Չինաստանի Հանրապետությունը․․․»,- ասել է նա։
Չինաստանի ԱԳՆ խոսնակը հայտարարել է, որ «եթե Միացյալ Նահանգները պնդի իր այդ ճանապարհը, նա կկրի հետևանքների ողջ պատասխանատվությունը»:
Ավելի վաղ հաղորդվել էր, որ ԱՄՆ Կոնգրեսի Ներկայացուցիչների պալատի արտաքին քաղաքականության հանձնաժողովի ղեկավար Մայքլ Մաքքոլը հայտարարել է, որ գլխավորելու է պատվիրակությունը, որը մայիսի վերջին կայցելի Թայվան՝ շնորհավորելու կղզու վարչակազմի նոր ղեկավարին երդմնակալության կապակցությամբ։