Պուտինը հայտնել է, թե որ դեպքում է ՌԴ-ն պատրաստ միջուկային զենք կիրառել
2 րոպեի ընթերցում
![Պուտինը հայտնել է, թե որ դեպքում է ՌԴ-ն պատրաստ միջուկային զենք կիրառել](http://armenpress.am/resized/480/static/news/b/2024/03/1132335.jpg)
ԵՐԵՎԱՆ, 13 ՄԱՐՏԻ, ԱՐՄԵՆՊՐԵՍ։ Ռազմատեխնիկական տեսանկյունից Ռուսաստանը պատրաստ է միջուկային պատերազմի և պատրաստ է միջուկային զենք կիրառել, եթե հարցը վերաբերում է ռուսական պետության գոյությանը։ «Արմենպրես»-ի փոխանցմամբ՝ այս մասին հայտնել է ՌԴ նախագահ Վլադիմիր Պուտինը լրագրող Դմիտրի Կիսելյովին տված հարցազրույցում։
«Ռազմատեխնիկական տեսանկյունից մենք, իհարկե, պատրաստ ենք։ Դրանք (խմբ․՝ միջուկային զենքերը) մեզ մոտ մշտապես գտնվում են մարտական պատրաստության վիճակում», - ասել է ՌԴ նախագահը։
Նա նաև շեշտել է, որ Ուկրաինայում ռազմական գործողություններում մարտավարական միջուկային զենք գործածելու կարիք չկա, սակայն նշել է, թե ո՛ր պարագայում Ռուսաստանը կարող է միջուկային զենք օգտագործել։
«Զենքը գոյություն ունի, որպեսզի օգտագործվի, մենք ունենք մեր սկզբունքները։ Ըստ դրանց՝ մենք պատրաստ ենք օգտագործել զենք, այդ թվում՝ ցանկացած զենք, այդ թվում՝ ձեր նշածը, եթե խոսքը գնում է ռուսական պետության գոյության մասին, մեր ինքնիշխանությանը և անկախությանը վնասելու մասին։ Այդ ամենը շարադրված է մեր ռազմավարության մեջ, մենք այն չենք փոխել», - ասել է Պուտինը։
Ավելի վաղ Կրեմլի ղեկավարը հայտարարել էր, որ Ռուսաստանի միջուկային տրիադան (միջուկային սպառազինությունը ցամաքում, ծովում և օդում) ավելի ժամանակակից է, քան այլ երկրների տրիադաները։