არფინე სარგსიანი საქართველოს შსს-ის კრიმინალისტიკური და სასაზღვრო დანაყოფების მუშაობას გაეცნო
2 წუთი კითხვის
სამუშაო ვიზიტით საქართველოში მყოფი სომხეთის შინაგან საქმეთა მინისტრი არფინე სარგსიანი, საქართველოს შინაგანი საქმეთა მინისტრ სულხან თამაზაშვილთან ერთად, საექსპერტო-კრიმინალისტიკურ დეპარტამენტს ეწვია და დეპარტამენტის საქმიანობის თავისებურებებს გაეცნო.
როგორც „არმენპრესი“ სომხეთის შს სამინისტროს მიერ გავრცელებული განცხადებიდან იუწყება, არფინე სარგსიანის ხელმძღვანელობით მოქმედი დელეგაციის წევრებმა დაათვალიერეს თანამედროვე აღჭურვილობით აღჭურვილი ლაბორატორიები, გაეცნენ სატრანსპორტო და ტექნიკურ საშუალებებს, აგრეთვე მაღალტექნოლოგიურ მოძრავ კრიმინალისტიკურ ლაბორატორიებს.
ვიზიტის ფარგლებში დელეგაციის წევრები შეხვდნენ საქართველოს შინაგან საქმეთა მინისტრის მოადგილე შალვა თადუმაძესა და საექსპერტო-კრიმინალისტიკური დეპარტამენტის დირექტორ თენგიზ სისაურს.
სულხან თამაზაშვილი და არფინე სარგსიანი ბათუმში საჩვენებელ სამაშველო სწავლებას დაესწრნენ.
სწავლებაში მონაწილეობდნენ სამინისტროს სასაზღვრო პოლიციის სანაპირო დაცვის დეპარტამენტის, განსაკუთრებულ დავალებათა ავიაციის დეპარტამენტისა და საგანგებო სიტუაციების მართვის სამსახურის თანამშრომლები.
წარმოდგენილ იქნა ზღვაში მომხდარ ინციდენტებზე სწრაფი რეაგირების, სხვადასხვა დანაყოფის თანამშრომლობისა და სამაშველო ღონისძიებების ჯეროვნად ორგანიზების შესაძლებლობები.
საჩვენებელი ღონისძიების მსვლელობისას გამოყენებულ იქნა მცურავი საშუალებები, უპილოტო საფრენი აპარატი და სასაზღვრო პოლიციის ვერტმფრენი.