სომხეთთან უკანონო მიგრანტთა განთავსების ცენტრის შექმნის საკითხი არ განხილულა - საგარეო საქმეთა სამინისტრო

სომხეთში ევროკავშირის წევრი ქვეყნების უკანონო მიგრანტთა განთავსების ცენტრის შექმნის წინადადება ერევნისთვის არ წარუდგენიათ და აღნიშნული საკითხი სომხურ მხარესთან არ განხილულა.

„არმენპრესთან“ საუბარში ამის შესახებ სომხეთის საგარეო საქმეთა სამინისტროს პრესსპიკერმა ანი ბადალიანმა განაცხადა - გავრცელებული ცნობების საპასუხოდ, რომელთა თანახმადაც, ევროკავშირის საბჭოს 4 აგვისტოს დაგეგმილ სხდომაზე იტალია განსახილველად წარადგენს რიგ ქვეყნებში, მათ შორის სომხეთში, უკანონო მიგრანტთა განთავსების ცენტრების შექმნის საკითხს.

„ჩვენთვის მსგავსი წინადადება არ გაუკეთებიათ, ჩვენთან ასეთი საკითხი არ განხილულა“, - აღნიშნა ანი ბადალიანმა.

Euronews-ი 3 აგვისტოს წერდა, რომ ევროკავშირის საბჭოს 4 აგვისტოს სხდომაზე რიგ ქვეყნებში უკანონო მიგრანტთა განთავსების ადგილების შექმნის წინადადებას იტალიის შინაგან საქმეთა მინისტრი მათეო პიანტედოსი წარადგენს.

აღინიშნება, რომ სავარაუდო მიმღებ ქვეყნებს შორის აფრიკის რამდენიმე სახელმწიფოა, რომელთაგან ერთ-ერთი ყველაზე სავარაუდო ვარიანტი უგანდაა.

იტალია გამოდის ევროკავშირის ფარგლებს გარეთ მოქმედი უკანონო მიგრანტთა განთავსების ცენტრების ქსელის შექმნის ინიციატივით, რომელიც უკანონო მიგრაციის მართვას მოემსახურება.

ახალი ცენტრები, იტალიის წინადადების თანახმად, ევროკავშირის სახსრებით დაფინანსდება.

Euronews-ის ცნობით, იტალია ასეთი ცენტრების შექმნას აფრიკის რიგ სახელმწიფოებსა და ტრადიციული მიგრაციული მარშრუტების მიღმა მდებარე რამდენიმე სხვა ქვეყანაშიც ითხოვს. სავარაუდო კანდიდატ ქვეყნებს შორის არიან განა, სენეგალი, ტუნისი, ლიბია, მავრიტანია, ეგვიპტე, უგანდა, ეთიოპია, უზბეკეთი, სომხეთი და მონტენეგრო.

Euronews-ი ასევე წერს, რომ იტალიის წინადადების პროექტი იტალიურ რიგ მედიასაშუალებებში გამოქვეყნდა და იგი იტალიელმა ოფიციალურმა პირებმაც დაადასტურეს.