სომხეთში პორტუგალიის ახლადდანიშნულმა ელჩმა რწმუნებათა სიგელების ასლი საგარეო საქმეთა მინისტრის მოადგილეს გადასცა

სომხეთის რესპუბლიკის საგარეო საქმეთა მინისტრის მოადგილემ მნაცაკან საფარიანმა სომხეთში პორტუგალიის ახლადდანიშნული ელჩი სარა ფერონია მარტინსი (რეზიდენციით მოსკოვში) რწმუნებათა სიგელების ასლის გადაცემასთან დაკავშირებით მიიღო.

„არმენპრესის“ ინფორმაციით, ამის შესახებ განცხადებას სომხეთის საგარეო საქმეთა სამინისტრო ავრცელებს.

მინისტრის მოადგილემ ელჩ მარტინსს დიპლომატიური მისიის დაწყება მიულოცა და ნაყოფიერი საქმიანობა და წარმატებები უსურვა. მან ასევე რწმენა გამოთქვა, რომ ელჩის უფლებამოსილების პერიოდში სომხეთ-პორტუგალიის ურთიერთობები კიდევ უფრო განმტკიცდება, რაც ხელს შეუწყობს ორმხრივად სასარგებლო თანამშრომლობის გაფართოებასა და განვითარებას.

თანამოსაუბრეებმა აზრები გაცვალეს ორმხრივი დღის წესრიგის მთელ რიგ საკითხებზე და ხაზი გაუსვეს სავაჭრო-ეკონომიკური თანამშრომლობის გააქტიურების აუცილებლობას. ამ კონტექსტში ყურადღება დაეთმო ასევე ევროპულ ბაზრებზე სომხური პროდუქციის წარმომადგენლობის გაფართოებისა და ახალი შესაძლებლობების გამოვლენის პერსპექტივებს.

შეხვედრისას მხარეები ასევე შეეხნენ რეგიონული და საერთაშორისო დღის წესრიგის აქტუალურ საკითხებს.