სომხეთიდან ესპანეთში გარგარი ჯერ არ ექსპორტირებულა: ეკონომიკის მინისტრის მოადგილემ გავრცელებული ხმები უარყო
2 წუთი კითხვის
სომხეთის ეკონომიკის მინისტრის მოადგილემ, არმან ხოჯოიანმა უარყო პრესაში გავრცელებული ინფორმაცია იმის შესახებ, თითქოს სომხეთიდან ესპანეთში ექსპორტირებული გარგარი გზაში გაფუჭდა და რეალიზაციისთვის უვარგისია.
19 ივლისს Armatmedia-მ დაწერა, თითქოს სომხეთიდან ესპანეთის მიმართულებით ექსპორტირებული გარგრის პარტია გზაში გაფუჭდა. საიტის ცნობით, ზიანი საკმაოდ დიდია: ევროპაში ჩასული სომხური გარგარი სარეალიზაციოდ უვარგისია.
„არმენპრესის“ ცნობით, აღნიშნულ პუბლიკაციაზე რეაგირებისას, სომხეთის ეკონომიკის მინისტრის მოადგილემ არმან ხოჯოიანმა თავის ფეისბუქ გვერდზე დაწერა, რომ სომხეთიდან ესპანეთში გარგარი ჯერ არ ექსპორტირებულა.
„მთელი ინტერნეტი საუბრობს იმაზე, რომ ესპანეთში ექსპორტირებული გარგარი გზაში გაფუჭდა. სომხეთის რესპუბლიკიდან ესპანეთში გარგარი ჯერ არ ექსპორტირებულა“, - დაწერა ხოჯოიანმა.
შეგახსენებთ, რომ რუსეთმა 2 ივნისიდან შეზღუდვები დააწესა სომხეთიდან კურკიანი ხილისა და ყურძნის იმპორტზე. ამ პერიოდში სომხეთის მთავრობამ ნაბიჯები გადადგა საექსპორტო ბაზრების დივერსიფიკაციის მიმართულებით, რის წყალობითაც შეიქმნა ევროპულ ბაზარზე სომხური პროდუქციის შესვლის შესაძლებლობა. სომხეთმა ამ დროისთვის უკვე განახორციელა გარკვეული საქონლის ექსპორტი ევროკავშირის ქვეყნებში. ევროკავშირი ასევე გეგმავს სომხური პროდუქციის დაახლოებით 80 პროცენტის იმპორტის საბაჟო გადასახადების დროებით გაუქმებას, როგორც სომხეთის მხარდაჭერას რუსეთის ფედერაციის მიერ დაწესებული შეზღუდვების ფონზე.