3 წუთი კითხვის
ევროკავშირი სომხეთში სამი სასაზღვრო გამშვები პუნქტის აშენებას გეგმავს, ხოლო ამ პროექტების განხორციელების პირველი წინაპირობა ტერიტორიების განაღმვა იქნება.
„არმენპრესის“ ცნობით, ამის შესახებ ერევანში ჟურნალისტებთან ბრიფინგზე სომხეთის რესპუბლიკაში ევროკავშირის ელჩმა ვასილის მარაგოსმა განაცხადა, როდესაც ევროკავშირის მიერ სომხეთისთვის გადაცემული თანამედროვე განაღმვის მანქანა წარადგინა.
იმ კითხვაზე პასუხისას, თუ იქნება თუ არა მანქანა გამოყენებული მხოლოდ სასაზღვრო ზოლში მცხოვრები მოსახლეობის უსაფრთხოებისთვის, თუ ასევე ინფრასტრუქტურული პროექტებისთვის, მარაგოსმა უპასუხა, რომ მას ორივე მიმართულებით ექნება მნიშვნელოვანი ფუნქცია.
„საკომუნიკაციო პროექტები მოითხოვს იმ ტერიტორიების გაწმენდას, რომლებზეც ისინი უნდა გაიარონ. როგორც მოგეხსენებათ, ჩვენ უკვე ავიღეთ ვალდებულება, ავაშენოთ სამი სასაზღვრო გამშვები პუნქტი და ახლა ამ პროექტის დეტალებზე ვმუშაობთ. თუმცა, განაღმვა იქნება პირველი აუცილებელი ნაბიჯი, რათა ამ მნიშვნელოვანი სამშენებლო სამუშაოების წინსვლა შესაძლებელი გახდეს“, - აღნიშნა მარაგოსმა, თუმცა დეტალები იმის შესახებ, თუ სად არის დაგეგმილი სასაზღვრო პუნქტების მშენებლობა, არ დაუკონკრეტებია.
მან დასძინა, რომ ევროპული კავშირი აგრძელებს სომხეთთან თანამშრომლობის გაღრმავებას და ინვესტიციებს დებს როგორც უსაფრთხოების, ისე ინფრასტრუქტურის განვითარების მიმართულებით.
სომხეთში ევროკავშირის ელჩის შეფასებით, ევროკავშირი თანმიმდევრულად მუშაობს სომხეთთან ურთიერთობების გაღრმავებაზე და ეს თანამშრომლობა სომხეთის მოქალაქეებისთვის უკვე ხელშესახებ შედეგებს იძლევა.
„ჩვენ ვმუშაობთ ევროკავშირსა და სომხეთს შორის ურთიერთობების გაღრმავების მიმართულებით და ეს სომეხი ხალხისთვის ძალიან კონკრეტულ სარგებელს მოაქვს. ევროპულმა კავშირმა ინვესტიციები ჩადო კონფლიქტისგან დაზარალებული მოსახლეობის უსაფრთხოების უზრუნველყოფაში სხვადასხვა პროგრამების, ასევე სომხეთში ევროკავშირის სადამკვირვებლო მისიის (EUMA) საქმიანობის მეშვეობით. ახლა ჩვენ ასევე ვდებთ ინვესტიციებს სიცოცხლის გადარჩენის საქმეში სომხეთის განაღმვის ოპერაციების ცენტრთან თანამშრომლობით“, - ხაზგასმით აღნიშნა ვასილის მარაგოსმა და დააკონკრეტა, რომ სომხეთისთვის გადაცემული განაღმვის მანქანა ხორვატიაშია წარმოებული და ის ევროპელი გადამხდელების სოლიდარობის კონკრეტული გამოვლინებაა სომხეთის მიმართ.