აზერბაიჯანის გავლით სომხეთში რუსული ხორბლის ახალი პარტია შედის

რუსეთი აზერბაიჯანის გავლით, სარკინიგზო ტრანსპორტით, სომხეთში ხორბლის მორიგ პარტიას გზავნის.

„არმენპრესის“ ცნობით, ამის შესახებ აზერბაიჯანული სააგენტო APA იტყობინება.

აღნიშნულია, რომ სომხეთში იგზავნება 14 ვაგონი ხორბალი, რომლის საერთო წონა 976 ტონას შეადგენს.

ამ დროისთვის რუსეთიდან აზერბაიჯანის გავლით სომხეთში უკვე გადაზიდულია 35 ათას ტონაზე მეტი ხორბალი, დაახლოებით 8 ტონა სასუქი, 133 ტონა ალუმინი, 68 ტონა წიწიბურა და 414 ტონა ანთრაციტი.

სააგენტო ასევე იუწყება, რომ დღეის მდგომარეობით აზერბაიჯანიდან სომხეთში გაიგზავნა 14 ათას ტონაზე მეტი დიზელის საწვავი და დაახლოებით 5 ათასი ტონა ბენზინი.