2 წუთი კითხვის
სომხეთი-თურქეთის ურთიერთობების მოწესრიგების პროცესში სომხეთის წარმომადგენელმა, სომხეთის ეროვნული ასამბლეის ვიცე-სპიკერმა რუბენ რუბინიანმა განაცხადა, რომ თურქეთში ამოქმედებული ახალი რეგულაციის წყალობით, სომხეთსა და თურქეთს შორის პირდაპირი ვაჭრობა ხელახალი გაფორმების გარეშე შესაძლებელი გახდა.
„კარგი ამბავი ბიზნესმენებისთვის. სომხეთი-თურქეთის მოწესრიგების პროცესის ფარგლებში, თურქეთში ამოქმედებული ახალი რეგულაციის წყალობით, ამიერიდან შესაძლებელი იქნება სომხეთიდან რომელიმე მესამე ქვეყანაში და იქიდან თურქეთში გაგზავნილი, ან იმავე მარშრუტით თურქეთიდან სომხეთში შემოსული საქონლის საბოლოო დანიშნულების ან ამოსავალ წერტილად მიეთითოს „სომხეთი/თურქეთი“.
ეს ნიშნავს, რომ საბაჟო თვალსაზრისით, სომხეთსა და თურქეთს შორის პირდაპირი ვაჭრობა ხელახალი გაფორმების გარეშე შესაძლებელი გახდა.
ჩვენ ვაგრძელებთ მუშაობას საზღვრის, მათ შორის გიუმრი-ყარსის რკინიგზის გახსნის მიმართულებით“, - წერს რუბინიანი „ფეისბუქის“ საკუთარ გვერდზე, რასაც „არმენპრესი“ ავრცელებს.
თურქეთის საგარეო საქმეთა სამინისტრომ 13 მაისს გაავრცელა განცხადება, რომელშიც ნათქვამია, რომ სომხეთთან პირდაპირი ვაჭრობის დასაწყებად მოსამზადებელი სამუშაოები დასრულებულია.