ესპანეთის პრემიერ-მინისტრი ერევანში ჩავიდა: მისი თვითმფრინავი 3 მაისს ანკარაში საგანგებოდ დაეშვა
2 წუთი კითხვის
ესპანეთის პრემიერ-მინისტრი პედრო სანჩესი ერევანში ევროპული პოლიტიკური საზოგადოების მე-8 სამიტში მონაწილეობის მისაღებად ჩავიდა.
„არმენპრესის“ კორესპონდენტის ცნობით, „ზვართნოცის“ აეროპორტში ესპანეთის პრემიერ-მინისტრს სომხეთის ვიცე-პრემიერი მჰერ გრიგორიანი დახვდა.
სანჩესი ერევანში 3 მაისს უნდა ჩასულიყო, თუმცა ტექნიკური პრობლემების გამო, მისი თვითმფრინავი თურქეთის დედაქალაქ ანკარაში საგანგებოდ დაეშვა.
ევროპული პოლიტიკური საზოგადოების მე-8 სამიტი 4 მაისს ერევანში იმართება თემით։ „მომავლის მშენებლობა: ერთიანობა და სტაბილურობა ევროპაში“.
ევროპული პოლიტიკური საზოგადოების პირველი სამიტი ჩეხეთის დედაქალაქ პრაღაში 2022 წლის 6 ოქტომბერს ჩატარდა. მას შემდეგ სამიტები თანმიმდევრობით გაიმართა მოლდოვის დედაქალაქ კიშინიოვში, ესპანეთის ქალაქ გრანადაში, გაერთიანებული სამეფოს ოქსფორდშირის საგრაფოში, უნგრეთის დედაქალაქ ბუდაპეშტში, ალბანეთის დედაქალაქ ტირანაში და დანიის დედაქალაქ კოპენჰაგენში.
ევროპული პოლიტიკური საზოგადოება აერთიანებს დაახლოებით 50 ევროპული ქვეყნის ლიდერს თანასწორობის საფუძველზე, ერთიანობის სულისკვეთებითა და საერთო მიზნით. იგი წარმოადგენს პოლიტიკურ პლატფორმას პოლიტიკური დიალოგისა და თანამშრომლობის სტიმულირებისთვის საერთო ინტერესის საკითხების მოსაგვარებლად, აგრეთვე ევროპის კონტინენტის უსაფრთხოების, სტაბილურობისა და კეთილდღეობის გასამყარებლად. ევროპული პოლიტიკური საზოგადოების სამიტი ევროპელ ლიდერებს გამოცდილების გაზიარებისა და თანამშრომლობის გაფართოების შესაძლებლობას აძლევს. იგი არ ანაცვლებს არცერთ არსებულ ორგანიზაციას, სტრუქტურას ან პროცესს.