სომხეთმა აზერბაიჯანის ტერიტორიის გავლით და უშუალოდ აზერბაიჯანიდან იმპორტის მოცულობების შესახებ მონაცემები გამოაქვეყნა

სომხეთის სახელმწიფო შემოსავლების კომიტეტის საბაჟო სამსახურმა და ეკონომიკის სამინისტრომ გამოაქვეყნეს მონაცემები იმის შესახებ, თუ რა რაოდენობის საქონელი შემოვიდა სომხეთში რუსეთიდან და ყაზახეთიდან აზერბაიჯანის ტერიტორიის გავლით 2025 წლის ნოემბრიდან 2026 წლის 15 აპრილამდე. ასევე გამოქვეყნდა აზერბაიჯანიდან საქართველოს ტერიტორიის გავლით სომხეთში იმპორტის მაჩვენებლები.

„არმენპრესის“ მოთხოვნის საპასუხოდ, სახელმწიფო შემოსავლების კომიტეტიდან და ეკონომიკის სამინისტროდან აცნობეს, რომ რუსეთიდან და ყაზახეთიდან აზერბაიჯანის ტერიტორიის გავლით სომხეთში შემოტანილია 26 ათას 295 ტონა საქონელი, ხოლო აზერბაიჯანიდან - 9 ათას 337 ტონა საწვავი. უწყებებმა ხაზგასმით აღნიშნეს, რომ რეგიონული თანამშრომლობისა და მშვიდობის დამყარების შედეგები უკვე ხელშესახებია და ეკონომიკური განვითარებისთვის ახალ შესაძლებლობებს ქმნის.

სახელმწიფო შემოსავლების კომიტეტის საბაჟო სამსახურის მონაცემებით, სომხეთის რესპუბლიკაში რკინიგზის მეშვეობით, აზერბაიჯანის რესპუბლიკის ტერიტორიის გავლით, ტრანზიტის წესით საქონელი პირველად 2025 წლის 6 ნოემბერს შემოვიდა.

„რუსეთიდან და ყაზახეთიდან იმპორტირებულია 24 ათას 865 ტონა ხორბალი, 1362 ტონა სასუქი და 68 ტონა წიწიბურა. ხოლო აზერბაიჯანიდან სომხეთში, საქართველოს ტერიტორიის გავლით, რკინიგზით 2025 წლის დეკემბრიდან 2026 წლის 15 აპრილამდე იმპორტირებული და გაფორმებულია 9 ათას 337 ტონა აზერბაიჯანული წარმოშობის საწვავი, რომლის საერთო საბაჟო ღირებულება 7.2 მლნ აშშ დოლარს შეადგენს. აქედან: 5 ათას 398 ტონა დიზელის საწვავია (4.3 მლნ აშშ დოლარის საბაჟო ღირებულებით), ხოლო 3 ათას 939 ტონა ბენზინი (2.9 მლნ აშშ დოლარის საბაჟო ღირებულებით)“, - განაცხადეს უწყებებში.