ერევანი და მოსკოვი აზერბაიჯანის ტერიტორიის გავლით სომხეთიდან რუსეთში ტვირთების გადაზიდვის ორგანიზების საკითხს განიხილავენ։ ოვერჩუკი
2 წუთი კითხვის
ერევანი და მოსკოვი განიხილავენ სომხეთიდან რუსეთის ფედერაციაში აზერბაიჯანის ტერიტორიის გავლით ტვირთების გადაზიდვის ორგანიზების საკითხს․
„არმენპრესის“ ინფორმაციით, როგორც „ინტერფაქსი“ იუწყება, ამის შესახებ რუსეთის ფედერაციის ვიცე-პრემიერმა ალექსეი ოვერჩუკმა განაცხადა ტელეარხ „როსია 24“-თან მიცემულ ინტერვიუში.
„საუბარია სომხეთიდან რუსეთში აზერბაიჯანის ტერიტორიის გავლით უკუმიმართულებით ტვირთების გადაზიდვის უზრუნველყოფაზე։ ეს არის წინსვლა, რომელიც სულ ახლახან წარმოუდგენლად ჩანდა“, - აღნიშნა რუსეთის ვიცე-პრემიერმა და შეახსენა, რომ რუსეთმა უკვე განახორციელა მარცვლეულის ექსპორტი სომხეთში აზერბაიჯანის ტერიტორიის გავლით რკინიგზით.
მისივე თქმით, რუსეთი გეგმავს, რომ მარცვლეულის გარდა, აზერბაიჯანის ტერიტორიის გავლით სომხეთში ექსპორტზე გაიტანოს სასუქებიც.
„ბოლო პერიოდში მოხდა ძალიან მნიშვნელოვანი მოვლენა. გვქონდა პირველი მატარებელი რუსული მარცვლეულით, რომელიც აზერბაიჯანისა და საქართველოს ტერიტორიების გავლით შევიდა სომხეთში. ანუ, ოცდაათ წელზე მეტი ხნის განმავლობაში და სომხეთისა და აზერბაიჯანის დამოუკიდებლობის დასაწყისიდან პირველად, ამ მარშრუტით გაიარა მარცვლეულით დატვირთულმა მატარებელმა. ეს იყო რუსული მარცვლეული. ამის შემდეგ განხორციელდა ყაზახური მარცვლეულის მიწოდებაც. ჩვენ ასევე განვიხილავთ ამ მიმართულებით სხვა ტიპის ტვირთების, მათ შორის სასუქების გადაზიდვის შესაძლებლობას“, - განაცხადა ოვერჩუკმა.
მან ასევე შეახსენა, რომ რამდენიმე დღის წინ აზერბაიჯანიდან სომხეთში ჩამოვიდა ნავთობპროდუქტებით დატვირთული მატარებელი.