სომხეთის რესპუბლიკის ეროვნული ასამბლეის დეპუტატებმა ამერიკელ კონგრესმენებს სომხეთ-აზერბაიჯანის მშვიდობის პროცესის დეტალები გააცნეს
2 წუთი კითხვის
ვაშინგტონში სამუშაო ვიზიტით მყოფმა სომხეთის რესპუბლიკის ეროვნული ასამბლეის საგარეო ურთიერთობათა მუდმივმოქმედი კომიტეტის თავმჯდომარემ სარგის ხანდანიანმა და სომხეთ-აშშ-ის მეგობრობის ჯგუფის წევრებმა არუსიაკ ჯულჰაკიანმა, მარია კარაპეტიანმა და გეღამ ნაზარიანმა აშშ-ის წარმომადგენელთა პალატაში რიგი შეხვედრები გამართეს.
„არმენპრესის“ ინფორმაციით, სომხეთის ეროვნული ასამბლეიდან აცნობებენ, რომ დელეგაცია შეხვდა აშშ-ის კონგრესის წარმომადგენელთა პალატის წევრ კეროლ მილერს, კონგრესის სომხური საკითხების კომიტეტის წევრ კიმ იანგს, ასევე კონგრესმენებს რობერტ ადერჰოლტსა და დელია რამირესს.
შეხვედრებისას ხაზი გაესვა სომხეთსა და აშშ-ს შორის მიმდინარე წლის იანვარში გაფორმებული მრავალდარგოვანი სტრატეგიული პარტნიორობის მნიშვნელობას, ასევე პარლამენტთაშორისი აქტიური ურთიერთობების შემდგომი განვითარების აუცილებლობას.
დეპუტატებმა კონგრესმენებს გააცნეს სომხეთ-აზერბაიჯანის მშვიდობის პროცესის დეტალები და სომხეთის მზადყოფნა, რაც შეიძლება მალე მოეწეროს ხელი სამშვიდობო შეთანხმებას.
განხილულ იქნა რეგიონული სატრანსპორტო და ეკონომიკური კომუნიკაციების განბლოკვის შესაძლებლობები, სომხეთის მთავრობის „მშვიდობის გზაჯვარედინი“ პროექტი. ორივე მხარემ აღნიშნა სამხრეთ კავკასიაში მდგრადი და გრძელვადიანი მშვიდობის დამყარების აუცილებლობა.