ვლადიმერ პუტინი და სი ძინპინი კრემლში მოლაპარაკებებს გამართავენ

კრემლში რუსეთის ფედერაციის პრეზიდენტი ვლადიმერ პუტინი ჩინეთის სახალხო რესპუბლიკის პრეზიდენტ სი ძინპინს ხვდება. როგორც „არმენპრესი“ იტყობინება „ინტერფაქსზე“ დაყრდნობით, ჩინეთის ლიდერი 8 მაისს დღის უმეტეს ნაწილს დაუთმობს რუს კოლეგასთან მოლაპარაკებებს, ხოლო 9 მაისს მონაწილეობას მიიღებს გამარჯვების 80-ე წლისთავისთვის მიძღვნილ ღონისძიებებში, სადაც იქნება მთავარი უცხოელი სტუმარი.

როგორც მანამდე განუცხადა ჟურნალისტებს რუსეთის პრეზიდენტის თანაშემწემ იური უშაკოვმა, პუტინისა და სი ძინპინის მოლაპარაკებები დაიწყება ვიწრო შემადგენლობით, თუმცა პრაქტიკულად იგი ფართო ფორმატში ჩაივლის, ჩინური დელეგაციის რაოდენობის გათვალისწინებით.

რუსეთ-ჩინეთის სამიტი შემდეგ გაფართოებული ფორმატით გაგრძელდება, მთავრობის წევრებისა და მსხვილი კომპანიების ხელმძღვანელების მონაწილეობით. დაგეგმილია ორი ერთობლივი განცხადების მიღება, მათ შორის გლობალური სტრატეგიული სტაბილურობის შესახებ, ლიდერთა პრესასთან გამოსვლა და ოფიციალური სადილი დელეგაციების მონაწილეობით.

პუტინი და სი ძინპინი მგრძნობიარე საკითხებზე ცალკე იმსჯელებენ ჩაის წვეულებისას, რომელიც ყველა ოფიციალური ღონისძიების დასრულების შემდეგ გაიმართება. მსგავსი არაოფიციალური შეხვედრები ბოლო წლებში ყველა რუსეთ-ჩინეთის სამიტის ნაწილი ყოფილა.