სომხეთის პრემიერ-მინისტრის ხელმძღვანელობით გაიმართა სომხეთის მეცნიერებისა და ტექნოლოგიების განვითარების საბჭოს სხდომა

სომხეთის რესპუბლიკის პრემიერ-მინისტრ ნიკოლ ფაშინიანის ხელმძღვანელობით გაიმართა პრემიერ-მინისტრთან არსებული სომხეთის მეცნიერებისა და ტექნოლოგიების განვითარების საბჭოს მესამე სხდომა.

ეროვნული ასამბლეის თავმჯდომარის მოადგილემ, საბჭოს აღმასრულებელი კომიტეტის თავმჯდომარემ ჰაკობ არშაკიანმა წარადგინა წინა სხდომის შედეგებით განხორციელებული სამუშაოები.

როგორც „არმენპრესი“ პრემიერ-მინისტრის აპარატის გავრცელებულ ინფორმაციაზე დაყრდნობით იუწყება, განისაზღვრა შემდეგი მიმართულებები: ხელოვნური ინტელექტი, რობოტიკა, ავიაკოსმოსური ტექნოლოგიები, მიკროელექტრონიკა, ნახევარგამტარები, კვანტური ტექნოლოგიები, ბიოტექნოლოგია, სიცოცხლის მეცნიერება. ჰაკობ არშაკიანმა აღნიშნა, რომ საჭიროა მექანიზმების შექმნა აღნიშნული მიმართულებებით სტრატეგიული პროგრამების დასაგეგმად და სახელმწიფო პროცესებთან შესაჯერებლად. ამ მიზნით, სამუშაო ჯგუფმა შეიმუშავა და განხილვისთვის წარადგინა ინოვაციების სომხური ფონდის კონცეფცია.

სხდომის დროს განხილულ იქნა ფონდის წესდების მიზნები, ფუნქციები და მართვის პროცესი. ყურადღება გამახვილდა ფონდის მართვის საბჭოში სახელმწიფო და კერძო სექტორის პროპორციაზე და ფორმატზე, ასევე ფონდის საქმიანობასა და ანგარიშგების მექანიზმებზე. წარმოდგენილი საკითხების ირგვლივ გაიმართა აზრთა გაცვლა, გამოთქმული იყო სხვადასხვა მოსაზრებები და წინადადებები.

პრემიერ-მინისტრმა ფაშინიანმა ხაზი გაუსვა ფონდის საქმიანობის ეფექტურად ორგანიზების მნიშვნელობას და ამ კონტექსტში ხაზგასმით აღნიშნა დაინტერესებული მხარეების ინტენსიური თანამშრომლობის საჭიროება.