თუ აზერბაიჯანთან კომუნიკაციების განბლოკვა მოხდება, სომხეთი ტრანზიტის პროცედურების გამარტივებას შესაძლებლად მიიჩნევს։ მირზოიანი

სამხრეთ კავკასიაში კომუნიკაციების განბლოკვის შემთხვევაში, სომხეთი შესაძლებლად მიიჩნევს აზერბაიჯანთან სატრანსპორტო კომუნიკაციების პროცედურების გამარტივებას.

როგორც „არმენპრესი“ იუწყება, სომხეთის საგარეო საქმეთა მინისტრმა არარატ მირზოიანმა ამ საკითხზე ისაუბრა ერევანში გამართულ პრესკონფერენციაზე, რომელიც საქართველოს საგარეო საქმეთა მინისტრ მაკა ბოჭორიშვილთან ერთად ჩატარდა.

არარატ მირზოიანის თქმით, ამ საკითხზე სომხეთს ახალი სათქმელი არ აქვს, რადგან ერევნის პოზიცია დიდი ხანია ცნობილია.

„ჩვენ მხარს ვუჭერთ რეგიონში კომუნიკაციების განბლოკვის იდეას“, – განაცხადა საგარეო საქმეთა მინისტრმა და აღნიშნა, რომ სომხეთმა აზერბაიჯანს კონსტრუქციული წინადადებები უკვე წარუდგინა და ელოდება პასუხს.

მირზოიანმა ასევე გამოთქვა დარწმუნებულობა, რომ იმ პირობებით, რომლითაც სომხეთი კომუნიკაციების განბლოკვას ხედავს, მნიშვნელოვანი ეკონომიკური სარგებელი ექნება მთელ რეგიონს სომხეთს, აზერბაიჯანს და საქართველოს.

„ჩვენი ხედვა ასახულია „მშვიდობის გზაჯვარედინის“ პროექტში, რომელიც ემყარება ქვეყნების ტერიტორიული მთლიანობისა და ინფრასტრუქტურებზე სუვერენიტეტის პრინციპებს“, – განაცხადა მინისტრმა.

მან ასევე აღნიშნა, რომ 21-ე საუკუნეში ყველა ქვეყანა ცდილობს ლოგისტიკის გამარტივებას.

„თუ აზერბაიჯანთან გზები განიბლოკება, ჩვენც ვხედავთ გარკვეულ გამარტივებულ პროცედურებს, რომლებიც შესაძლოა დაინერგოს, რაც სარგებელს მოუტანს როგორც სომხეთს, ისე აზერბაიჯანს“, – განაცხადა მირზოიანმა და კიდევ ერთხელ დაადასტურა, რომ ერევნის პოზიცია კომუნიკაციების განბლოკვის საკითხზე უცვლელია.

აზერბაიჯანის პრეზიდენტმა ილჰამ ალიევმა 28 იანვარს განაცხადა, რომ სომხეთის მიერ წამოყენებულ „მშვიდობის გზაჯვარედინის“ პროექტს აზერბაიჯანის გარეშე აზრი არ აქვს და მას არანაირი ღირებულება არ გააჩნია.

მან ასევე აღნიშნა, თითქოს სომხეთი ვალდებულია აზერბაიჯანს შეუფერხებელი დერეფანი მიაწოდოს ნახიჩევანისკენ.