2 րոպեի ընթերցում
ԵՐԵՎԱՆ, 23 ՕԳՈՍՏՈՍԻ, ԱՐՄԵՆՊՐԵՍ: Եվրոպա լիգայի որակավորման փլեյ-օֆֆ փուլի «Արարատ-Արմենիա»-ի և Լյուքսեմբուրգի «Ֆ91 Դյուդելանժ»-ի հանդիպմանը Երևանի Վազգեն Սարգսյանի անվան Հանրապետական մարզադաշտում իր հայուհի կնոջ հետ հետևել է նաև Լյուքսեմբուրգում Հայաստանի պատվավոր հյուպատոս, ազգությամբ լյուքսեմբուրգցի Ֆրանկ Էնգելը: Ամուսինները հանդիպման ընթացքում` որպես երկրպագու, գտնվում էին հակառակ բևեռներում` Ֆրանկ Էնգելը երկրպագում էր իր հայրենակիցներին, իսկ նրա կինը` Տաթև Մանուկյանը` հայկական ակումբին: «Արմենպրես»-ի հետ զրույցում, այնուամենայնիվ, Էնգելը նշեց, որ այս խաղն ու անցկացման վայրը հատուկ նշանակություն ունեն, իսկ խաղի կարևորությունն ընկերական միջավայրն է:
«Այս խաղի կարևորությունն ընկերությունն է։ Մենք եկել ենք որպես ընկեր և զգում ենք այստեղ ընկերական մթնոլորտը։ Թիմերից մեկը հաղթելու է, սակայն մյուսի չհաղթելու դեպքում էլ մնալու ենք ընկերներ»,- նշեց նա:
Ֆրանկ Էնգելը դժվարացավ նշել, թե որ թիմը երկու խաղի արդյունքում հաղթող կճանաչվի:
«Արարատ-Արմենիան ուժեղ թիմ է, և, եթե հաղթի, ապա արժանի կլինի այդ հաղթանակին»,- ասաց Էնգելը:
Լյուքսեմբուրգում ՀՀ պատվավոր հյուպատոս Ֆրանկ Էնգելի հետ միասին Երևանում ընթացող խաղը դիտում էր նաև ՀՀ-ում Լյուքսեմբուրգի պատվավոր հյուպատոս Սուրեն Զոհրաբյանը:
«Երեք գոլերի ընթացքում հետևում էի Լյուքսեմբուրգում Հայաստանի պատվո հյուպատոսի և Հայաստանում Լյուքսեմբուրգի պատվո հյուպատոսի ռեակցիաներին...»,-«Ֆեյսբուք» սոցիալական ցանցի իր էջում գրել է Տաթև Մանուկյանը:
Ֆուտբոլի Եվրոպայի լիգայի որակավորման փլեյ-օֆֆ-ի «Արարատ-Արմենիա»-«Ֆ91 Դյուդելանժ» ֆուտբոլային դիմակայության առաջին հանդիպումը Երևանում ավարտվեց 2։1 հաշվով՝ հայկական թիմի հաղթանակով։ Թիմերի միջև պատասխան հանդիպում կկայանա օգոստոսի 29-ին, Լյուքսեմբուրգում: Դիմակայության արդյունքում հաղթողը կստանա Եվրոպա լիգայի խմբային փուլի ուղեգիր: