2 րոպեի ընթերցում
ԵՐԵՎԱՆ, 30 ՀՈՒԼԻՍԻ, ԱՐՄԵՆՊՐԵՍ: Երևանի քաղաքապետարանի ենթակայության տակ գտնվող 2-րդ, 6-րդ և 8-րդ հատուկ դպրոցներից մոտ 300 երեխայի քաղաքապետարանը տեղափոխում է հանրակրթական դպրոցներ:
«Արմենպրես»-ի հաղորդմամբ՝ հրավիրված մամուլի ասուլիսի ժամանակ այս մասին ասաց Երևանի քաղաքապետարանի հանրակրթության վարչության պետ Աննա Ստեփանյանը:
Նա շեշտեց, որ հատուկ դպրոցները շուտով վերակազմավորվելու են որպես աջակցման կենտրոններ:
«Մենք դեռևս շատ անելիքներ ունենք, արդեն վստահ կարող եմ ասել, որ Երևանը պատրաստ է ամբողջությամբ անցնել ներառական կրթության: Երևանի 155 դպրոցից 54-ում բավականին երկար տարիներ իրականացվել է ներառական կրթություն: Այդ դպրոցներն այսօր արդեն բավականին մեծ փորձ ունեն: Անցյալ տարվանից մենք սկսեցինք գործընթացը, և երբ եղավ Կառավարության որոշումը՝ նախագիծն արդեն կար: Մենթոր դպրոցների միջոցով մենք սկսեցինք նաև հարակից դպրոցները կանոնակարգելու գործընթացը»,- նշեց Ստեփանյանը և հավելեց, որ այս պահին իրենց հիմնական աշխատանքն է ուսուցիչների վերապատրաստումը, ինչպես նաև ծնողների աջակցությունը:
Նրա խոսքով՝ «Հույսի կամուրջ» կազմակերպության շնորհիվ Երևանի 65 դպրոցում իրականացվել է վերապատրաստում:
Հունիսի 12-ին Ազգային ժողովի գիտության, կրթության, մշակույթի, սփյուռքի, երիտասարդության և սպորտի հարցերի և Ֆինանսավարկային և բյուջետային հարցերի մշտական հանձնաժողովների համատեղ նիստի ընթացքում ՀՀ կրթության, գիտության, մշակույթի և սպորտի նախարար Արայիկ Հարությունյանն ասել է, որ Երևանը, Շիրակի և Արագածոտնի մարզերը սեպտեմբեր ամսից կանցնեն համընդհանուր ներառական կրթության: 2018 թվականին ներառական կրթության անցում է կատարվել Արմավիրի մարզում: