ԼՀԿ-ի նախաձեռնությամբ կհրավիրվի ԱԺ արտահերթ նիստ. «Իմ քայլը» համաձայնություն չի տվել նիստի ձևակերպումներին /լրացված/

ԵՐԵՎԱՆ, 21 ՄԱՅԻՍԻ, ԱՐՄԵՆՊՐԵՍ: ՀՀ ազգային ժողովի «Լուսավոր Հայաստան» խմբակցության նախաձեռնած՝ ԱԺ արտահերթ նիստը կկայանա մայիսի 22-ին: «Արմենպրես»-ի հաղորդմամբ՝ այս մասին իր «Ֆեյսբուք»-ի էջում տեղեկացրել է կուսակցության մամուլի քարտուղար Արեն Պետունցը:

«Ինչպես արդեն հայտնել էինք, «Լուսավոր Հայաստան» խմբակցությունը նախաձեռնել է ԱԺ արտահերթ նիստ՝ քննարկելու նախորդ օրվա իրադարձությունները։ Նախաձեռնությանը միացել են նաև «Բարգավաճ Հայաստան» խմբակցության 18 պատգամավորները: Համաձայն «Իմ քայլը» խմբակցության հետ ձեռքբերված համաձայնության՝ նիստը տեղի կունենա մայիսի 22-ին, ժամը 11։00-ին»,-նշել է Պետունցը:

Մայիսի 20-ին ԱԺ «Լուսավոր Հայաստան» խմբակցությունը խմբակցության նիստում որոշում էր կայացրել հրավիրել Ազգային ժողովի արտահերթ նիստ, ինչի համար նախաձեռնել էր ստորագրահավաք։ ԼՀ խմբակցությունը առաջարկում է արտահերթ նիստին քննարկել վարչապետ Նիկոլ Փաշինյանի կողմից տարածված հայտարարության հիման վրա քաղաքացիների կողմից դատարանների շենքերի շրջափակման հետևանքով Հայաստանի Հանրապետությունում ստեղծված իրադրությունը և դատաիրավական համակարգի բարեփոխումների իրականացման հնարավորությունը:

ՀՀ վարչապետ Նիկոլ Փաշինյանը ՀՀ քաղաքացիներին կոչ էր արել մայիսի 20-ին, առավոտյան ժամը 08:30-ից արգելափակել Հանրապետության դատարանների մուտքերն ու ելքերը: Այնուհետև կայացած խորհրդակցությանը Նիկոլ Փաշինյանը մեկնաբանեց մայիսի 20-ի վաղ առավոտից Հայաստանի բոլոր դատարանների մուտքերն արգելափակելու իր կոչի խորհուրդն ու նպատակը: Ավելի ուշ «Ֆեյսբուք»-ի իր ուղիղ եթերում վարչապետը հորդորեց 13:30-ից վերացնել բոլոր դատարանների արգելափակումը:

ԼՐԱՑՈՒՄ. ԱԺ «Իմ քայլը» խմբակցության ղեկավար Լիլիթ Մակունցը նշում է. «Լուսավոր Հայաստանը չունի «ԻՄ ՔԱՅԼԸ» խմբակցության նույնիսկ նախնական համաձայնությունը արտահերթ նիստ հրավիրելու վերաբերյալ այն ձևակերպումներով, որոնք առաջարկվել է: Այս մասին հեռախոսազրույցում երեկ ասել եմ պարոն Գորգիսյանին, իսկ քիչ առաջ նաև պարոն Մարուքյանին»: