ՀԱԱՀ ռեկտորը Նիկոլ Փաշինյանին ներկայացրեց համալսարանի բարեփոխումները
2 րոպեի ընթերցում
![ՀԱԱՀ ռեկտորը Նիկոլ Փաշինյանին ներկայացրեց համալսարանի բարեփոխումները](http://armenpress.am/resized/480/static/news/b/2019/04/971319.jpg)
ԵՐԵՎԱՆ, 15 ԱՊՐԻԼԻ, ԱՐՄԵՆՊՐԵՍ։ Հայաստանի Հանրապետության վարչապետ Նիկոլ Փաշինյանը շրջայց կատարեց Հայաստանի ազգային ագրարային համալսարանում։
«Արմենպրես»-ի փոխանցմամբ՝ Ագրարային համալսարանի ռեկտոր Վարդան Ուռուտյանը վարչապետին ներկայացրեց համալսարանում կատարված և նախատեսվող բարեփոխումները։
«Բուհը նախատեսում է անցնել բակալավրիատի 4 տարվա և մագիստրական 2 տարվա կրթական ծրագրերին։ Շուտով կստեղծվի նաև գիտելիքների ստուգման և թեստավորման նոր կենտրոնը։ Կենտրոնի ստեղծման համար արդեն ունենք բոստոնահայ բարերար ընտանիքի կողմից մոտ 36 մլն դրամի նվիրատվություն»,- ասաց Ուռուտյանը։
Նիկոլ Փաշինյանը նշեց, որ Ագրարային համալսարանը կարևոր է նրանով, որ երկրի աշխատուժի մեծ մասը զբաղված է գյուղատնտեսության ոլորտում, բայց մարդիկ չարչարվում են առանց արդյունքի։
«Մեր խնդիրն այն է, որ չարչարանքը դառնա աշխատանք։ Տարբերությունն այն է, որ երկրորդի մեջ հաճույքի ու բավարարվածության շատ մեծ կոմպոնենտ կա, և կլինի արդյունավետ։ Պետք է նաև հնարավորինս ֆիզիկական ուժի կիրառումը նվազի ու ավելանա մտավոր ռեսուրսի կիրառումը»,- նշեց Փաշինյանը։
Վարչապետին ներկայացվեցին նաև այն նախագծերն ու ծրագրերը, որոնք արդեն կյանքի են կոչվել բարերարների ու համալսարանի համաֆինանսավորման շնորհիվ։