396.54
Արթուր Վանեցյանի կարծիքով՝ ԱԱԾ-ի տնօրենի կամ Ոստիկանապետի պաշտոնը քաղաքականացնել չարժե
1 րոպեի ընթերցում
ԵՐԵՎԱՆ, 22 ՄԱՐՏԻ, ԱՐՄԵՆՊՐԵՍ: Հայաստանում իրավապահ մարմինները չեն խուսափում խորհրդարանական վերահսկողությունից: Ազգային ժողովում՝ լրագրողների հետ զրույցում այս մասին նշեց ԱԱԾ տնօրեն Արթուր Վանեցյանը: Նա լրագրողների խնդրանքով իր կարծիքը ներկայացրեց Ազգային անվտանգության ծառայությունը և Ոստիկանությունը նախարարություններ դարձնելու առաջարկությունների վերաբերյալ:
«Եթե կլինի քաղաքական որոշում, ապա կենթարկվենք դրան: Բայց ուզում եմ ընդգծել, որ եթե դրա նպատակը խորհրդարանական վերահսկողությունն է, ապա այսօր վառ օրինակ է, որ մենք չենք խուսափում խորհրդարանական վերահսկողությունից: Ցանկացած ժամանակ կարող ենք գալ և պատասխանել Ազգային ժողովի պատգամավորների հարցերին փակ, թե բաց ֆորմատով»,- «Արմենպրես»-ի հաղորդմամբ՝ ասաց Արթուր Վանեցյանը:
Նա նշեց, որ քաղաքական հրահանգներ վարչապետի կողմից առհասարակ չեն լինում, ԱԱԾ-ն գործում է օրենքի շրջանակներում:
«Կարծում եմ, որ Ազգային անվտանգության ծառայության տնօրենի կամ Ոստիկանապետի պաշտոնը քաղաքականացնել չարժե, որովհետև եթե մենք դառնանք նախարարներ, ապա լինելու ենք քաղաքական պաշտոն զբաղեցնող անձինք և ուզենք թե չուզենք սպասարկելու ենք որևէ ուժի շահերը»,-ասել էր նա:
Բաժանորդագրվեք մեր ալիքին Telegram-ում