Հայաստանը վարելու է ճկուն և նախաձեռնողական արտաքին քաղաքականություն. Մխիթար Հայրապետյանի ուղերձը Դիվանագետի օրվա առթիվ

ԵՐԵՎԱՆ, 3 ՄԱՐՏԻ, ԱՐՄԵՆՊՐԵՍ: ՀՀԱԺ գիտության, կրթության, մշակույթի, սփյուռքի,

սպորտի և երիտասարդության հարցերի մշտական հանձնաժողովի նախագահՄխիթար Հայրապետյանը շնորհավորական ուղերձ է հղել Հայաստանում մարտի 2-ին նշվող Դիվանագետի օրվա կապակցությամբ։

«Արմենպրես»-ի հաղորդմամբ՝ ուղերձում նշված է. «Արդեն մի քանի տարի է, ինչ մարտի 2-ը Հայաստանում նշվում է որպես դիվանագետի օր. 27 տարի առաջ հենց այս օրը Հայաստանի Հանրապետությունն անդամակցեց ՄԱԿ-ին՝ ընդունելով համամարդկային արժեքների, մարդու իրավունքների պաշտպանության և ժողովրդավարության հաստատման սկզբունքները որպես պետական գաղափարախոսության անբաժանելի մաս:

Նորանկախ Հայաստանի պատմության մեջ սկսեցին հատկապես կարևոր դերակատարում ունենալ դիվանագետները, որոնք թե՛ Հայաստանում, թե՛ Հայաստանի սահմաններից դուրս ամենօրյա նվիրված աշխատանքի շնորհիվ բարձր են պահում մեր երկրի հեղինակությունը, նպաստում հյուրընկալ պետությունների հետ հարաբերությունների զարգացմանը: Հայ դիվանագետները, իսկապես, մեր երկրի հպարտությունն են. պատիվ ունեմ նրանցից շատերին անձամբ ճանաչելու, տեսնելու, թե ինչ հարգանքով ու դրվատանքով են նրանց մասին խոսում օտար գործընկերները: Հայ դիվանագետները մշտապես հավատարիմ են իրենց առաքելությանն ու հայ համայնքին՝ անկախ իրենց ծառայության երկրի բարդ իրավիճակից:

Հետհեղափոխական Հայաստանը, հավատարիմ իր որդեգրած գաղափարներին, վարելու է ճկուն և նախաձեռնողական արտաքին քաղաքականություն՝ առաջնորդվելով Հայաստանի Հանրապետության և հայ ժողովրդի հավաքական շահերով: Կառավարությանն արտաքին քաղաքականության իրականացման գործընթացում աջակցելու է նաև խորհրդարանը՝ երկկողմ և բազմակողմ մակարդակներում օգտագործելով խորհրդարանական դիվանագիտության լայն հնարավորությունները:

Վերադառնալով օրվա խորհրդին՝ կրկին ցանկանում եմ շնորհավորել աշխարհի չորս կողմերում ծառայող դիվանագետ գործընկերներիս և մաղթել նրանց բեղուն և արգասաբեր աշխատանք՝ ի շահ Հայաստանի Հանրապետության»: