ԱՄՀ-ն Հայաստանի համար կանխատեսում է 4.5 տոկոս տնտեսական աճ. նախորդ երկու տարիներին կանխատեսվածն իրական ցուցանիշից ցածր է եղել
2 րոպեի ընթերցում
ԵՐԵՎԱՆ, 26 ՓԵՏՐՎԱՐԻ, ԱՐՄԵՆՊՐԵՍ: Արժույթի միջազգային հիմնադրամը Հայաստանի համար 2019թ-ին կանխատեսում է 4.5 տոկոս տնտեսական աճ: Այդ կանխատեսման համար զգալի գործոն է եղել նաև արտաքին միջավայրի ազդեցությունը: «Արմենպրես»-ի հաղորդմամբ՝ այս մասին հրավիրված ասուլիսում հայտնեց ԱՄՀ հայաստանյան առաքելության ղեկավար Հոսեյն Սամին՝ամփոփելով ԱՄՀ պատվիրակության՝ Երևան կատարած երկշաբաթյա այցը:
«Հայաստանի համար 2019-ին կանխատեսել ենք 4.5 տոկոս տնտեսական աճ: Այդ կանխատեսումը կատարելիս մենք հենվում ենք 3-4 գործոնի վրա: Դրանցից առաջինն աճի ներուժն է, կամ, այսպես ասած, պոտենցիալ աճը, որն արտացոլում է տնտեսության աճի կարողության չափը: Հայաստանում, մեր կարծիքով, այն 4.5 տոկոս է»,-ասաց հայաստանյան առաքելության ղեկավարը:
Նրա խոսքով՝ երկրորդ գործոնն այն է, որ փոքր բաց տնտեսությունների համար բավականին լուրջ կարող է լինել արտաքին միջավայրի ազդեցությունը: ԱՄՀ-ի գնահատմամբ՝ այս տարի արտաքին միջավայրը ավելի քիչ բարենպաստ ազդեցություն կունենա: «Դա, մասնավորապես, պայմանավորված կլինի պղնձի գներով և արտերկրից փոխանցումներով, որոնք Հայաստանի տնտեսական աճի մեջ բավական զգալի դերակատարում ունեն»,-նշեց Սամին:
Նա, այնուամենայնիվ, նկատեց, որ 2017թ-ին տնտեսական աճը զգալիորեն բարձր է եղել ԱՄՀ-ի կանխատեսած ներուժի ցուցանիշից: 2018-ի ցուցանիշը ևս բարձր է եղել իրենց կանխատեսումներից: