Հայաստանում ձերբակալված Վրաստանի քաղաքացին կասկածվում է թմրանյութերի ապօրինի շրջանառության մեջ
1 րոպեի ընթերցում
![Հայաստանում ձերբակալված Վրաստանի քաղաքացին կասկածվում է թմրանյութերի ապօրինի շրջանառության մեջ](http://armenpress.am/resized/480/static/news/b/2019/02/962894.jpg)
ԵՐԵՎԱՆ, ՓԵՏՐՎԱՐԻ 2, ԱՐՄԵՆՊՐԵՍ: ՀՀ ոստիկանության Քանաքեռ-Զեյթունի բաժնի քրեական հետախույզների կողմից բերման է ենթարկվել Հայաստանում մշտական բնակության վայր չունեցող, թմրանյութերի ապօրինի շրջանառության մեջ կասկածվող Միխայել Բրուդիանին: Ինչպես «Արմենպրես»-ին տեղեկացրին ՀՀ ոստիկանության հասարակայնության հետ կապի և լրատվության վարչությունից, ՀՀ ոստիկանության օպրատիվ տվյալների համաձայն` 37-ամյա Վրաստանի քաղաքացին ապօրինի ձեռք էր բերել մետանֆիտամին, կոկային և սփայս տեսակի թմրամիջոցներ:
Քրեական հետախույզները նրան հայտանաբերել են մայրաքաղաքի Դավիթ Անհաղթի փողոցում ու բերման ենթակել Ոստիկանության Քանաքեռ-Զեյթունի բաժին: Բերման ենթարկվածի անձնական խուզարկությամբ հայտնաբերվել է մետանֆիտամին թմրամիջոցին նմանվող բյուրեղանման զանգվածներով 6 փաթեթ, կոկայինին նմանվող սպիտակ փոշենման զանգվածով մեկ փաթեթ, սփայսի նմանվող զանգվածներով 9 փաթեթ և 25 սմ երկարությամբ դանակ: Հայտնաբերվածներն ուղարկվել է Ոստիկանության փորձաքրեագիտական վարչություն: Նշանակվել են դատաքիմիական, տոքսիկաքիմիական ,դատաքրեագիտական փորձաքննություններ: 37-ամյա Մախաել Բրուդիանին ձերբակալվել է: Հայտնաբերված զանգվածների ձեռքբերման աղբյուրները պարզվում են: