2 րոպեի ընթերցում
ԵՐԵՎԱՆ, 20 ԴԵԿՏԵՄԲԵՐԻ, ԱՐՄԵՆՊՐԵՍ: Կարեն Խաչատրյանի «Չիպոլինո» մանկական բալետային ներկայացումը շարունակելու է հիացնել հանդիսատեսին:
Ինչպես տեղեկացնում է «Արմենպրես»-ը, այս մասին ասաց Ալ. Սպենդիարյանի անվան օպերայի և բալետի ազգային ակադեմիական թատրոնի տնօրեն և գեղարվեստական ղեկավար Կոնստանտին Օրբելյանը:
«Մենք այս տարի հանդիսատեսին ներկայացրեցինք «Չիպոլինո» մանկական բալետը, որի բեմադրության համար ծավալուն և բարդ աշխատանք է կատարվել, իսկ հանդիսատեսը մեծ բավականություն է ստացել, սակայն հետո ողբերգական և սարսափելի պատահար տեղի ունեցավ մեր արտիստ Վահագն Մարգարյանի հետ, որը բավականին էմոցիոնալ ազդեցություն ունեցավ բոլորիս վրա»,- ասաց Օրբելյանը:
Նրա կարծիքով` «Չիպոլինո» մանկական բալետային ներկայացումը մեծ ապագա ունի թատրոնում։
«Կարծում եմ, որ այս գեղեցիկ բալետային ներկայացումը կլինի այն ներկայացումների շարքում, որոնք ապագա ունեն մեր թատրոնում»,- ասաց Օրբելյանը:
«Չիպոլինո»-ի դեկորները և հագուստները Մոսկվայի Մեծ թատրոնից բերվել են մաեստրո Կոնստանտին Օրբելյանի նախաձեռնությամբ և «Կոնստանտին Օրբելյան» հիմնադրամի աջակցությամբ: Դիրիժորներն են Հարություն Արզումանյանը, Կարեն Լավչյանը, բեմադրող-բալետմայստերը՝ Հենրիխ Մայորովը, բալետային խմբի ղեկավարը՝ ՀՀ արվեստի վաստակավոր գործիչ Արմեն Գրիգորյանը: «Չիպոլինո»-ի պրեմիերան առաջին անգամ կայացել է 1974 թվականին՝ Կիևում: Հենրիխ Մայորովին անձամբ կոմպոզիտոր Կարեն Խաչատրյանն է հրավիրել այն բեմադրելու: