1 րոպեի ընթերցում
ԵՐԵՎԱՆ, 20 ԴԵԿՏԵՄԲԵՐԻ, ԱՐՄԵՆՊՐԵՍ: Կրթության և գիտության նախարարի պաշտոնակատար Արայիկ Հարությունյանը վստահեցնում է, որ Տնտեսագիտական համալսարանի ռեկտորի ժամանակավոր պաշտոնակատարի նշանակումն արվել է՝ հիմնվելով նրա գիտելիքների վրա: «Պարոն Հայրապետյանը դոկտոր, պրոֆեսոր է, 31 տարեկան, և կարծում եմ, այս հանգամանքը միայն բավարար է պատշաճ կերպով նրա գիտելիքները գնահատելու համար», - «Արմենպրես»-ի փոխանցմամբ, ասաց Հարությունյանը՝ կառավարության նիստից հետո լրագրողների հետ զրույցում անդրադառնալով հարցին, թե արդյոք սա չի՞ նշանակում քաղաքականության թափանցում բուհ, քանի որ Հայրապետյանը ավագանու անդամ էր ընտրվել «Իմ քայլը» դաշինքով, իսկ ներկայիս իշխանությունը ՀՀԿ-ին մշտապես քննադատում էր բուհեր թափանցելու համար:
Տնտեսագիտական համալսարանի ռեկտորի պաշտոնում որպես ժամանակավոր պաշտոնակատար է նշանակվել Կառավարման ամբիոնի վարիչի ժ/պ, տնտեսագիտության դոկտոր, ՀՀ ամենաերիտասարդ պրոֆեսոր Ռուբեն Հայրապետյանը:
Համալսարնի ռեկտորի պաշտոնը նախկինում զբաղեցնում էր Կորյուն Աթոյանը: