Տիգրան Ավինյանը ընտրարշավին լիարժեքորեն մասնակցել չկարողանալու համար հայցում է ընտրողների ներողամտությունը
2 րոպեի ընթերցում
ԵՐԵՎԱՆ, 4 ԴԵԿՏԵՄԲԵՐԻ, ԱՐՄԵՆՊՐԵՍ: ՀՀ փոխվարչապետի պաշտոնակատար Տիգրան Ավինյանը աշխատանքային ժամերից հետո փորձում է առավելագույնս շփվել քաղաքացիների հետ՝ ինչքան որ թույլ է տալիս փոխվարչապետի պաշտոնակատարի աշխատանքային ծանրաբեռնվածությունը: Սակայն փոխվարչապետի պաշտոնակատարը դա ընտրարշավին լիարժեք մասնակցություն չի համարում և հայցում է ընտրողների ներողամտություն: «Արմենպրես»-ի հաղորդմամբ՝ այս մասին Ավինյանն ասել է «Ֆեյսբուք»-ի իր էջի ուղիղ եթերում:
«Մի քանի օր հետո ժողովուրդը կտոնի հեղափոխության վերջնական հաղթանակը: Ես «Իմ քայլը» դաշինքի կողմից առաջադրված պատգամավորի թեկնածու եմ Արաբկիր, Դավթաշեն և Աջափնյակ վարչական շրջաններում: Ուզում եմ ընտրողներից հայցել ներողամտություն, քանի որ չեմ կարողանում լիարժեքորեն մասնակցել ընտրարշավին և տասնյակ հազարավոր մարդկանց հետ հանդիպումներ ունենալ: Ամեն երեկո աշխատանքային ժամերից հետո փորձում եմ առավելագույնս շփվել մեր քաղաքացիների հետ, որքանով որ թույլ է տալիս փոխվարչապետի պաշտոնակատարի աշխատանքային ծանրաբեռնվածությունը: Նաև քաջ գիտակցում եմ, որ սա չափազանց քիչ է»,- ասաց Ավինյանը:
Նրա կարծիքով՝ հասկանալի է նաև, որ մեր երկում ընթանում են ճակատագրական ընտրություններ, և պետք է նաև ապահովվի կառավարության բնականոն գործունեությունը: Ավինյանը տեղեկացրեց, որ շարունակելու է երեկոյան ժամերին հանդիպումներ իրականացնել թիվ 2 ընտրատարածքում: Հանդիպումների մանրամասների մասին կարելի է տեղեկանալ Ավինյանի «Ֆեյսբուք»-ի էջի միջոցով:
Ավինյանը վստահեցրեց, որ իրենց շտաբերի անդամները սիրով կլսեն բոլորի հարցերն ու առաջարկությունները: «Համոզված եղեք, որ ձեր հարցերն ու առաջարկները կհասնեն իրենց հասցեատիրոջը, և իմ հետագա գործունեության ընթացքում հաշվի կառնվեն»,- եզրափակեց փոխվարչապետի պաշտոնակատարը: