ՀՀ նախագահ Ռոբերտ Քոչարյանին իր հավատարմագրերն է հանձնել Հայաստանում Եգիպտոսի Արաբական Հանրապետության նորանշանակ դեսպան Վահիդ էլ Դին Իսմայիլ Գալալը
2 րոպեի ընթերցում
ԵՐԵՎԱՆ, 18 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ նախագահ Ռոբերտ Քոչարյանին այսօր իր հավատարմագրերն է հանձնել Հայաստանում Եգիպտոսի Արաբական Հանրապետության նորանշանակ դեսպան Վահիդ էլ Դին Իսմայիլ Գալալը: Ինչպես «Արմենպրեսե-ին տեղեկացրին ՀՀ նախագահի մամլո գրասենյակից, շնորհավորելով դեսպանին` հանրապետության նախագահը գոհունակություն է հայտնել հայ-եգիպտական հարաբերությունների դինամիկ զարգացման առթիվ եւ ընդգծել, որ Հայաստանը կարեւորում է արաբական առաջատար այդ պետության հետ փոխգործակցության հետագա ընդլայնումը` ներառելով նոր ոլորտներ: Ռոբերտ Քոչարյանը ջերմությամբ է հիշել ամիսներ առաջ Եգիպտոս կատարած պաշտոնական այցը եւ նշել, որ խիստ տպավորված է հազարամյակների պատմություն ունեցող այս պետության հնագույն քաղաքակրթությամբ, հսկայական պատմական ու մշակությանի ժառանգությամբ: Նա վստահություն է հայտնել, որ այցի ընթացքում ձեռք բերված պայմանավորվածությունները նաեւ դեսպանի գործունեության արդյունքում հնարավորինս արագ կյանքի կկոչվեն: Դեսպան Վ. Գալալն ասել է, որ ունի Հայաստանի հետ համագործակցության փորձ, մինչ նշանակումը ղեկավարել է ԱՊՀ, եվրոպական իսլամական ու նորանկախ երկրների հետ տեխնիկական համագործակցության եգիպտական հիմնադրամը, որի շնորհիվ Հայաստանից բազմաթիվ պաշտոնյաներ են վերապատրաստվել Եգիպտոսում: Զրուցակիցները խոսել են նաեւ երկկողմ փոխգործակցության զարգացման հեռանկարի մասին` կարեւորելով մշակույթի, տեղեկատվական տեխնոլոգիաների, զբոսաշրջության ոլորտներում գործակցության ընդլայնումը, երկու երկրների մասնավոր հատվածների մերձեցումը: