2 րոպեի ընթերցում
ԵՐԵՎԱՆ, 3 ԴԵԿՏԵՄԲԵՐԻ, ԱՐՄԵՆՊՐԵՍ: Քաղաքական ուժերն այս քարոզարշավին քիչ են խոսում իրենց տնտեսական զարգացման ծրագրերի մասին: ՀՀ փոխվարչապետի պաշտոնակատար Տիգրան Ավինյանը դա պատճառաբանում է նրանով, որ ՀՀԿ-ն ևս մասնակցում է ընտրություններին, և բոլորը խոսում ու հարցեր են տալիս ՀՀԿ-«Իմ քայլը» «հակամարտության» մասին:
«Արմենպրես»-ի հաղորդմամբ՝ Ավինյանը նման տեսակետ հայտնեց դեկտեմբերի 3-ին լրագրողների հետ ճեպազրույցում:
«Տնտեսական ծրագրերից մենք միշտ ցանկանում ենք խոսել: Շատ հարցազրույցներում և առհասարակ քաղաքական քննարկումներում տնտեսական զարգացման ծրագրերի մասին շատ ավելի քիչ է խոսվում: Կարծում եմ, որ սա կապված է նաև այն հանգամանքով, որ ՀՀԿ-ն մասնակցում է ընտրություններին, և կամա թե ակամա բոլորը սկսում են խոսել և հարցեր տալ ՀՀԿ-«Իմ քայլը» «հակամարտության» մասին: Կարծում եմ, որ սա հասկանալի է, սակայն ցավում եմ, որ իրական ծրագրերի մասին ավելի քիչ է խոսվում»,-ասաց Ավինյանը:
Նա նշեց, որ այս առումով սա այն ցանկալի քարոզարշավը չէր, որ կցանկանային իրականացնել:
Անդրադառնալով հանրապետականների այն դիտարկմանը, թե «Իմ քայլը» դաշինքն իրենց շատ է անդրադառնում՝ Ավինյանն ասաց, որ անդրադարձը բնական է, քանի որ Հանրապետական կուսակցությունը սովորական քաղաքական ուժ չէ: «ՀՀԿ-ն այն ուժն է, որը վերջին երկու տասնամյակում եղել է իշխանություն և տապալել է գրեթե բոլոր ոլորտները: Քանի որ ՀՀԿ-ի կողմից մեր ուղղությամբ անընդհատ կան մեղադրանքներ, դրանք պահանջում են որոշակի պատասխաններ: Եվ այդ պատասխանները տրվում են»,-ասաց Ավինյանն ու հավելեց՝ ընդ որում դրանք շատ համոզիչ են: