ԵՐԵՎԱՆ, 2 ՆՈՅԵՄԲԵՐԻ, ԱՐՄԵՆՊՐԵՍ: Կովկասի ինստիտուտի տնօրեն քաղաքագետ Ալեքսանդր Իսկանդարյանը Խորհրդարանի ցրումը համարում է իշխանափոխության ավարտ, որը սկսվել էր ապրիլ-մայիս ամիսներին:
«Արմենպրես»-ի հաղորդմամբ, լրագրողների հետ զրույցում, նա այսպիսի կարծիք հայտնեց՝ անդրադառնալով քաղաքական անցուդարձին և վերջին իրադարձություններին:
«Այն իրավիճակը, որն այսօր կա, կանխատեսելի էր: Նախորդ իրավիճակը, երբ Կառավարությունը ներկայացնում էր հին քաղաքական ուժը՝ չէր կարող երկար ձգվել»,- նշեց Իսկանդարյանը և կատակելով հավելեց, որ քաղաքականությանը պետք չէ հավատալ, քաղաքականությունը պետք է վերլուծել և հասկանալ, թե ինչ է կատարվում:
Նրա խոսքով՝ այս պահին կարևոր է, թե ինչ է լինելու ընտրություններից հետո, որովհետև, քաղաքագետի կարծիքով, հնարավոր են հակասություններ նոր Կառավարության ճամբարում:
«Պարզ է, որ այն մարդիկ, ովքեր համամասնական ցուցակով անցնեն՝ տարբեր հայացքներ և մոտեցումներ կունենան: Այս ամենն այնքանով է բացատրելի, որ «Քաղաքացիական պայմանագիր» կուսակցության գաղափարախոսությունն անհասկանալի է՝ նրանք պայքարում են կոռուպցիայի, կամայականության դեմ, բայց չգիտենք, թե ինչ են կառուցելու իրենք»,- ընդգծեց Իսկանդարյանը:
Արտահերթ խորհրդարանական ընտրություններն անցկացվելու են 2018 թվականի դեկտեմբերի 9-ին: