2 րոպեի ընթերցում
ԵՐԵՎԱՆ, 17 ՍԵՊՏԵՄԲԵՐԻ, ԱՐՄԵՆՊՐԵՍ:ՀՀ պաշտպանության նախարարության բարեփոխումների ընթացքն է քննարկվել ՀՀ նախագահ Ռոբերտ Քոչարյանի այսօր անցկացրած աշխատանքային խորհրդակցության ժամանակ, որին մասնակցել են հանրապետության վարչապետը, պաշտպանության նախարարը, Ազգային Ժողովի պաշտպանության, ազգային անվտանգության եւ ներքին գործերի մշտական հանձնաժողովի նախագահը, ՀՀ նախագահի աշխատակազմի ղեկավարը, պաշտոնատար այլ անձինք: Ինչպես «Արմենպրեսե-ին տեղեկացրին ՀՀ նախագահի մամլո գրասենյակից, հանրապետության նախագահն ասել է, որ իրականացվող բարեփոխումները հիմնականում ուղղված են պաշտպանության նախարարության նկատմամբ քաղաքացիական վերահսկողության ուժեղացմանը, համակարգի կառավարման արդյունավետության բարձրացմանն ու ռեսուրսների օպտիմալ օգտագործմանը: Նշելով, որ աշխատանքը նորմալ ընթացքում է, երկրի ղեկավարը կարեւորել է որոշ կոնցեպտուալ հարցերի վերաբերյալ վերջնական համաձայնությունը, ինչը թույլ կտա ավելի արագ առաջ շարժվել: Խորհրդակցության մասնակիցներն անդրադարձել են հատուկ քաղաքացիական ծառայության մասին օրենքի նախագծին, որը նախատեսվում է ընդունել մինչեւ տարեվերջ: Ամփոփելով խորհրդակցությունը` Ռոբերտ Քոչարյանն ասել է, որ առաջիկայում սպասվում է մեծ աշխատանք եւ հանձնարարել է գործել սահմանված ժամանակացույցին համապատասխան: