2 րոպեի ընթերցում
ԵՐԵՎԱՆ, 3 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ վարչապետ Նիկոլ Փաշինյանը հեռախոսազրույց է ունեցել նախագահ Արմեն Սարգսյանի հետ: «Նա ժողովրդի դեմ որևէ քայլ չի անի: Արմեն Սարգսյանը հանրապետությունում չէ՝ Նյու Յորքում է, կգա մասնակցելու Շառլ Ազնավուրի հրաժեշտի արարողություններին: Կխոսենք միմյանց հետ, նաև կարծում եմ, որ նա ցանկություն կունենա հանդիպել քաղաքական ուժերի հետ՝ քննարկել իրավիճակը»,- «Արմենպրես»-ի փոխայնցմամբ, Ազգային ժողովի բակում քաղաքացիների հետ հանդիպմանն ասաց Նիկոլ Փաշինյանը:
Միաժամանակ, վարչապետն ասաց, որ Ֆրանկոֆոնիայի գագաթաժողովի համատեսքտում գործընկերների հետ կքննարկի իրավիճակը: «Առաջիկա օրերին, այդ հարմար օրը, որը խելամիտ կլինի ընթացիկ պլանները չխաթարելու առումով, հրաժարական կտամ վարչապետի պաշտոնից, մնալով վարչապետի պաշտոնակատար: Այս ընթացքում կփորձեմ նշանակել նոր նախարարներ, մարզպետներ»,- ասաց ՀՀ վարչապետը:
Միաժամանակ, գործադիրի ղեկավարը նշեց, որ նպատակահարմար է համարում ընտրությունների անցկացման շուրջ ստորագրել հուշագիր, քանի նոր «մարդիկ նրանց բանավոր հավաստիացումներին հնարավոր է չվստահեն»:
Հայաստանի Հանրապետության վարչապետ Նիկոլ Փաշինյանի կոչով քաղաքացիները հոկտեմբերի 2-ի երեկոյան հավաքվել են Ազգային ժողովի շենքի մոտ: «Ֆեյսբուք»-ի ուղիղ եթերում ՀՀ վարչապետը նշել էր, որ ինքը տեղեկություն է ստացել, որ ՀՀԿ-ն ԱԺ արտահերթ նիստ է հրավիրել և պատրաստվում է կողմ քվեարկել ԱԺ կանոնակարգ օրենքում փոփոխությունների նախագծին, որի համաձայն՝ Ազգային ժողովի նիստի աշխատանքները որևէ պատճառով խոչընդոտելու դեպքում այն կարող է ընդհատված համարել: Ազգային ժողովն արտահերթ նիստում 67 կողմ ձայնով ընդունեց Ազգային ժողովի կանոնակարգ-օրենքում փոփոխություններ կատարելու մասին օրենքի նախագիծը, ինչից հետո վարչապետը ՀՀ նախագահ Արմեն Սարգսյանին կոչ արեց չստորագրել ընդունված օրինագիծը: