3 րոպեի ընթերցում
ԵՐԵՎԱՆ, 10 ՍԵՊՏԵՄԲԵՐԻ, ԱՐՄԵՆՊՐԵՍ: Երևանի քաղաքապետի թեկնածու, «Երկիր ծիրանի» խմբակցության ղեկավար Զարուհի Փոստանջյանը ներկայացրել է իր նախընտրական ծրագիրը։
«Արմենպրես»-ի հաղորդմամբ, Զարուհի Փոստանջյանը նախընտրական ծրագիրը ներկայացրել է լրագրողների հետ հանդիպման ժամանակ։
«Մենք առաջնորդվել ենք արդարության սկզբունքով, և օրենքի, իրավունքի գերակայությունը մեզ համար կարևորագույն արժեքներից են։ Հետևաբար, մենք այս արժեքների և սկզբունքների ներքո պատրաստվում ենք ստանձնել Երևանի կառավարումը և ծառայել մեր քաղաքացիներին»,- ասաց Զարուհի Փոստանջյանը։
«Երկիր ծիրանի» կուսակցությունը սեպտեմբերի 23-ին կայանալիք Երևանի ավագանու արտահերթ ընտրություններում հանդես է գալիս «Արդարություն և օրենք» կարգախոսով։ Նախընտրական ծրագիրը բաղկացած է 19 կետերից։ «Երկիր ծիրանին» նախընտրական ցուցակում 4-րդ համարն է։
«Երևանի բյուջեի ծախսերը և մուտքերը նույնպես քաղաքացիների համար լինելու են տեսանելի։ Տեսանելի ոչ միայն թղթային տարբերակով։ Սա շատ կարևոր գործընթաց է, որը մինչ այսօր Երևանում չենք տեսել»,- նշեց Փոստանջյանը։
Երևանցիներին հուզող հանրային և մասնավոր տրանսպորտի ոլորտում, ըստ «Երկիր ծիրանի» կուսակցության նախընտրական ծրագրի, նախատեսվում է կենտրոնացված և միասնական վճարման համակարգի ներդնում, որը ներառում է սոցիալական փաթեթներ ուսանողների, թոշակառուների և սոցիալապես անապահով խավի համար, Աջափնյակ կայարանի ավարտական կառուցման աշխատանքներ և այդ ուղղությամբ երկու կայարանի բացում: Տրամվայի շահագործում, ճոպանուղի-ֆունիկուլյորի զարգացում (Նոր Նորք-Կենտրոն, Սարի Թաղ-Կենտրոն և այլն):
Միջազգային համագործակցություն զարգացնելու համար նախատեսվում է զարգացնել կապերը ինչպես Երևանի քույր քաղաքների, այնպես էլ հայաշատ այլ քաղաքների հետ։ Ծրագրվում է ստեղծել և իրականացնել Հայաստան-Լոս Անջելես ուղիղ չվերթ։
«Երկիր ծիրանիի» նախընտրական ծրագրի կետերից քաղաքապետի թեկնածուն հատկապես կարևորեց կրթության քաղաքականությունը։
Զարուհի Փոստանջյանի ներկայացրած նախընտրական ծրագրի կարևոր կետերից են նաև գործարանների կառուցումը և աշխատատեղերի ստեղծումը։ Նախատեսվում է կառուցել կենցաղային թափոնների վերամշակման, վերելակների արտադրության (հավաքման) գործարաններ, ներդնել այլընտրանքային էներգիայի արտադրության համալիրներ: