388.23
Թուրքիայի արտգործնախարարին հաճախ են շփոթում Ադրբեջանի արտգործնախարարի հետ
2 րոպեի ընթերցում
ԵՐԵՎԱՆ, 21 ՀՈՒՆԻՍԻ, ԱՐՄԵՆՊՐԵՍ: Թուրքիայի արտգործնախարար Մևլութ Չավուշօղլուն նշել է, որ իրեն հաճախ են շփոթում Ադրբեջանի արտգործնախարար Էլմար Մամեդյարովի հետ:
Այս մասին, ինչպես հաղորդում է «Արմենպրես»-ը, հայտնում է ադրբեջանական «Հաքքին»-ը:
«Ես և Ադրբեջանի արտգործնախարար Էլմար Մամեդյարովն արտաքինից շատ նման ենք, և ինձ հաճախ են շփոթում նրա հետ: Ես դա հասկացել եմ, երբ ընդունելությունների և հանդիպումների ժամանակ ինձ Ադրբեջանի վերաբերյալ հարցեր են ուղղում»,- թուրքական «Վաթան» թերթի հետ զրույցում ասել է Մևլութ Չավուշօղլուն:
Չավուշօղլուն նշել է, որ Մամեդյարովին էլ երբեմն շփոթում են իր հետ:
«Նրան էլ մի անգամ հարց են տվել Թուրքիայի վերաբերյալ՝ մտածելով, թե ես եմ»,- ասել է արտգործնախարարը:
Թուրքիայի արտաքին գործերի նախարար Մևլութ Չավուշօղլուն օրեր առաջ հայտարարել էր, որ ինքը ոչ միայն Թուրքիայի, այլ նաև Ադրբեջանի արտգործնախարարն է:
Անդրադառնալով Արցախյան հակամարտությանը՝ Չավուշօղլուն հայտարարել էր, որ դա շարունակում է հանդիսանալ նաև Թուրքիայի խնդիրը:
Չավուշօղլուն հույս էր հայտնել, որ Թուրքիայի արտահերթ նախագահական և խորհրդարանական ընտրություններում հաղթելու է «Արդարություն և զարգացում» կուսակցությունը, և թուրք-ադրբեջանական հարաբերությունները շարունակելու են մնալ այնպիսին, ինչպիսին հիմա են:
Բաժանորդագրվեք մեր ալիքին Telegram-ում
